2024-yilni sarhisob qilar ekanmiz, Navoiy kon-metallurgiya kombinati korxonalarida ishlab chiqarishni kengaytirish, mahsulot hajmini oshirish, yangi texnologiyalarni qo‘llash, zavod va konlarni zamonaviy texnika va transport vositalari bilan ta’minlash, ishchi-xodimlarning mehnat sharoitlarini yaxshilashga qaratilgan keng ko‘lamli ishlar amalga oshirilganligiga guvoh bo‘lamiz.

Texnologik ishlab chiqarish zanjirining asosiy nuqtasi hisoblangan “Muruntov” konida hozirda keng qamrovli istiqbolli investitsiyaviy loyihalar muvaffaqiyatli amalga oshirilib kelinmoqda. So‘nggi yillarda oltin ishlab chiqarishni ko‘paytirishga yo‘naltirilgan loyihalardan biri – “Muruntov” koni beshinchi navbatining ochilishidir. Konchilik sohasida dunyo miqyosidagi eng so‘nggi ishlanmalar qo‘llanilayotgan bu loyihaning amalga oshirilishi konda yana uzoq yillar ma’dan qazib chiqarishni ta’minlash hamda 2-gidrometallurgiya zavodida qayta ishlash hajmini 50 mln. tonnadan oshirish imkonini berdi. 2013-yilda mazkur kondan rejalashtirilgan 44 mln. kubometrdan ortiq tog‘ jinslari qazib olingan bo‘lsa, 2023-yilga kelib ushbu reja ko‘rsatkichi 115 mln. kubometrni tashkil etdi. 2024-yilda esa 124 mln. kubometrdan oshdi.

“Muruntov” konining chuqurligi kengayishi natijasida qazib olinayotgan kon massalarini doimiy va vaqtinchalik saqlash joylariga yetkazishda ish samaradorligini oshirish, vaqt hamda xarajat miqdorini qisqartirish maqsadida, davriy oqimli texnologiya majmualaridan keng foydalanib kelinmoqda. Ayni paytda ham konda manzilli dastur doirasida Shimoliy-sharqiy davriy oqim texnologiyasi majmuasi hamda 2-konveyer liniyasini kengaytirish, elektr liniyalari, qo‘shimcha ag‘darma maydonini qurish, ag‘darma konveyer liniyasini 1,1 ming metrga uzaytirish ishlari davom etmoqda.

Bugungi kunda “Muruntov” konini o‘zlashtirishning 5-navbati investitsion loyihasi doirasida konning janubiy bortidagi 2-maydalash-yuklash punktini chuqurlashtirish bo‘yicha qurilish-montaj ishlari jadal sur’atlarda olib borilmoqda. Ushbu loyihani amalga oshirishning asosiy maqsadi – “Muruntov” konining quyi gorizontlarida tog‘-kon ishlarining susayishi, tog‘ jinslarining avtomobillarda tashish masofasining keskin oshishi va avtoag‘dargichlar taqchilligi muammolarini bartaraf etish va 2024-2026-yillarda davlat tomonidan belgilangan vazifalarni so‘zsiz bajarishga qaratilgan.

Tog‘ jinslarini konveyer liniyalar orqali tashish eng qulay, samarali va tejamkor imkoniyat ekani amalda isbotlangan. Bu, hech shubhasiz, ish samaradorligini oshirish bilan birga, ishchi kuchi, vaqt, transport xarajatlarini, yoqilg‘i-moylash materiallarini tejash demakdir. Loyihaning to‘liq amalga oshirilishi yiliga 15 mln. kubometr tog‘ jinslarini tashish imkonini berish bilan birga, 1 785 ta yangi ish o‘rinlarini ham yaratadi. Konveyer liniyalari kombinatning Navoiy mashinasozlik zavodi va Markaziy kon boshqarmasining Zarafshon ta’mirlash-mexanika zavodida to‘liq mahalliylashtirilgan holda tayyorlanmoqda.

“NKMK” AJ Matbuot xizmati.