Investitsiya dasturi Navoiy kon-metallurgiya kombinati faoliyatida muhim o‘rin egallaydi. Keyingi yillarda investitsiyaviy loyihalar bosqichma-bosqich amalga oshirilayotgani yangi konlarni o‘zlashtirish, gidrometallurgiya zavodlarini ishga tushirish, amaldagi korxonalarni modernizatsiyalash orqali maʼdan qayta ishlash quvvatlari, ishlab chiqarish hajmini oshirish, yangi ish o‘rinlarini yaratishga xizmat qilmoqda.

Bu kabi amaliy ishlarni kombinatning eng yirik bo‘linmasi – Markaziy kon boshqarmasi misolida ham ko‘rish mumkin. Xususan, korxonada tog‘ jinsini qazib olish 2023-yilda 115 mln. kubmetrni tashkil etgan bo‘lsa, 2024-yilda bu ko‘rsatkich 125,7 mln. kubmetrga teng bo‘ldi. Shuningdek, o‘tgan yilda gidrometallurgiya zavodlari va Oltinni uyumda ishqorlash sexida 81,5 mln. tonna maʼdan qayta ishlandi.

“NKMK” AJda 2025-yilda Investitsiya dasturi doirasida amalga oshirilishi rejalashtirilgan 9 ta loyihaning katta qismi Markaziy kon boshqarmasi hissasiga to‘g‘ri keladi. Jumladan, “Muruntov” konini o‘zlashtirishning 5-navbati (1-bosqich)”, “2-GMZ va 7-GMZ chiqindilarini birgalikda saqlash uchun 2-GMZ chiqindi omborini kengaytirish va rekonstruksiya qilish”, “7-GMZ qayta ishlash quvvatlarini kengaytirish” singari loyihalar amalga oshirilmoqda. Shuningdek, investitsiyaviy loyihalar bo‘yicha amaldagi korxonalarda eskirgan texnologik uskuna va mexanizmlarni energiya tejamkoriga almashtirish, yuqori texnik-iqtisodiy ko‘rsatkichlarga ega konchilik texnikalari va avtotransport vositalarini olib kelish ko‘zda tutilgan.

Bunyodkorlik ishlarini amalga oshirishda Zarafshon qurilish boshqarmasi bilan birgalikda kon boshqarmasining kapital qurilish bo‘limi, taʼmirlash-qurilish uchastkasi jamoalari ham faol ishtirok etib kelmoqda. Ular mana shunday saʼy-harakatlari bilan ko‘zda tutilgan obyektlarni o‘z vaqtida va sifatli qurib bitkazish yo‘lida astoydil mehnat qilib, kombinat yutuqlariga eʼtirofga arzigulik hissa qo‘shmoqdalar.

“NKMK” AJ Matbuot xizmati.