O‘zbekiston Respublikasi temir yo‘l transporti xodimlari kuniga

Navoiy kon-metallurgiya kombinatida ishlab chiqarish jarayonlarining uzluksizligini taʼminlash, konlardan qazib olinayotgan oltin tarkibli maʼdanni gidrometallurgiya zavodlariga tashish, ishchi-xodimlarni manzillarga yetkazishda temir yo‘l transporti muhim o‘rin tutadi. Ayni paytda kombinat bo‘linmalaridagi 2 ta temir yo‘l transporti boshqarmasi va 1 ta temir yo‘l sexida qariyb ikki ming nafar soha xodimlari faoliyat olib bormoqda.

So‘nggi yillarda kombinat tomonidan temir yo‘l infratuzilmasini modernizatsiya qilish, yangi temir yo‘l liniyalarini qurish, lokomotiv va vagonlar parkini bosqichma-bosqich yangilash bo‘yicha olib borilgan ishlar yuk tashish hajmini oshirish hamda transport xarajatlarini qisqartirishga xizmat qilmoqda.

Xususan, joriy yilda Markaziy kon boshqarmasining Temir yo‘l transporti boshqarmasi tomonidan “Muruntov” konida 1,2 kilometrdan ortiq masofada temir yo‘l yotqizilib, oyiga qariyb 500 ming tonna maʼdanni 2-gidrometallurgiya zavodiga tashish quvvatiga ega “Shimoliy” maʼdan yuklash punkti ishga tushirildi. 5-gidrometallurgiya zavodi va “Auminzo-Amantoy” koni oralig‘ida 6,3 kilometrlik yangi temir yo‘l liniyasini qurish bo‘yicha loyiha amalga oshirildi. Bu kabi ishlar temir yo‘l orqali yuk tashish jarayonida vaqt sarfini kamaytirish hamda yoqilg‘i-moylash mahsulotlarini iqtisod uchun muhim ahamiyatga ega.

- Kombinatda temir yo‘l transporti faoliyatining samaradorligini oshirish, infratuzilma, lokomotiv va vagonlar parkini yangilash hamda texnik imkoniyatlarni kengaytirishga alohida eʼtibor qaratilmoqda. Jumladan, shu yilning o‘tgan vaqti mobaynida “Qoqpatas va Dovg‘istov oltin konlarida maʼdan qazib olish (III navbati)” investitsion loyihasi doirasida Shimoliy kon boshqarmasi Temir yo‘l transporti boshqarmasiga yuqori texnik-iqtisodiy ko‘rsatkichlarga ega teplovozlar va o‘ziag‘daruvchi vagonlar (dumpkar) keltirildi. 2026-yilning birinchi yarim yilligida 38 mln. tonnadan ortiq maʼdan gidrometallurgiya zavodlariga tashilgan bo‘lsa, joriy yil yakuniga qadar ushbu ko‘rsatkichni 75 mln. tonnaga yetkazish rejalashtirilgan, - deydi “NKMK” AJ Temir yo‘l transporti bo‘limi boshlig‘i Zafar Sayemov.

Temir yo‘l transportida profilaktik taʼmirlash ishlarini raqamlashtirish, harakatni boshqarishda avtomatlashtirilgan tizimlarni joriy etish orqali ekspluatatsiya samaradorligini oshirish va texnik nosozliklarning oldini olishga qaratilgan chora-tadbirlar ham bajarilmoqda. Joriy yilda temir yo‘l sohasida faoliyat yuritayotgan 300 nafarga yaqin ishchi-xodimlar uchun zamonaviy texnika va texnologiyalar bilan ishlash ko‘nikmalarini rivojlantirishga qaratilgan o‘quv mashg‘ulotlari o‘tkaziladi.

Kombinat temir yo‘l transporti tizimini rivojlantirish, texnika parkini yangilash yo‘lida olib borilayotgan bu kabi ishlar korxonada qimmatbaho metallar ishlab chiqarish hajmini oshirishga xizmat qilmoqda.

“NKMK” AJ Matbuot xizmati