Oldin xabar berganimizdek, Navoiy kon-metallurgiya kombinatida joriy yilning 10-noyabr kunidan 10-dekabr kuniga qadar “Korrupsiyaga qarshi kurashish oyligi” o‘tkazilmoqda.

Mazkur oylik doirasida kombinat ishchi-xodimlarining huquqiy savodxonligini oshirish maqsadida korxona bo‘linmalarida profilaktik targ‘ibot tadbirlari tashkil etilmoqda. Xususan, Uchquduq shahrida “NKMK” AJ Komplayens xizmati, Uchquduq tuman prokuraturasi, NKMK IIB xodimlari ishtirokida Shimoliy kon boshqarmasi ishchi-xodimlari uchun o‘quv seminar o‘tkazildi.

Mazkur seminarda O‘zbekiston Respublikasi Prezidentining 2025-yil 21-apreldagi “Korrupsiyaga qarshi kurashish tizimini yana-da takomillashtirish bo‘yicha belgilangan ustuvor vazifalar ijrosini samarali tashkil etishga doir chora-tadbirlar to‘g‘risida”gi farmoni va 2025-yil 21-apreldagi “Davlat organlari va tashkilotlarining korrupsiyaga qarshi ichki nazorat bo‘linmalari mustaqilligini taʼminlash hamda faoliyati samaradorligini oshirish chora-tadbirlari to‘g‘risida”gi qarori, Korrupsiyaga qarshi kurashish siyosati, Monopoliyaga qarshi komplayens tizimi, Odob-axloq qoidalari va boshqa ichki idoraviy hujjatlar hamda kiberxavfsizlik va kiberjinoyatchilikning zararli oqibatlari, bank plastik kartasi bilan bog‘liq maʼlumotlarni begona shaxslarga bermaslik, zararli havolalarga kiritmaslik zarurligi to‘g‘risida tushunchalar berib o‘tildi.

Tadbirda kombinat faoliyatida ochiqlik va shaffoflikni taʼminlash, korrupsiyaga qarshi kurashish borasida amalga oshirilayotgan ishlar, korrupsiyaga nisbatan murosasiz munosabat yuzasidan ochiq muloqot, savol-javoblar bo‘lib o‘tdi.

Seminarda xodimlar o‘rtasida alohida tuzilgan savolnomalar asosida so‘rovnomalar o‘tkazildi, bukletlar tarqatildi hamda maxsus video rolik namoyish etildi.

“NKMK” AJ Komplayens xizmati