3-gidrometallurgiya zavodi Navoiy kon-metallurgiya kombinatining yirik sanoat korxonalaridan biri hisoblanadi. So‘nggi yillarda “Qoqpatas va Dovg‘iztov oltin konlarida maʼdan qazib olish (III navbati)” investitsion loyihasini amalga oshirish doirasida korxonada ishlab chiqarish quvvatlarini oshirish bo‘yicha keng ko‘lamli ishlar bajarildi.

O‘tgan yili zavodning biooksidlash sexida maʼdan qayta ishlash quvvatlarini kengaytirish bo‘yicha olib borilgan ishlar natijasida 9, 10-biooksidlash modullari ishga tushirilgan edi. Buning hisobiga jami bioreaktorlar soni 60 taga yetkazilib, sulfidli konsentratlarni qayta ishlash hajmini 25 foizga, tayyor mahsulot ishlab chiqarish hajmini 12 foizga oshirish imkoni yaratildi. Ushbu biooksidlash modullari ishga tushirilganligi bois kombinat mutaxassislari va quruvchilari tomonidan biorektorlardagi sovutish tizimini kengaytirishga qaratilgan qurilish ishlari olib borildi hamda bioreaktorlar uchun mo‘ljallangan suv sovutish minoralari ishga tushirildi.

Biooksidlash sexidagi bioreaktorlarda ishlanishi murakkab bo‘lgan sulfidli maʼdanni bakterial oksidlash jarayoni amalga oshirilishi keyingi sorbsiya jarayonini sezilarli darajada takomillashtiradi va shunga mos ravishda qimmatbaho metallni ajratib olishni oshiradi. Bakterial oksidlash jarayoni 42±2 gradus haroratda 120 soat davom etadi. Ushbu haroratni ushlab turish uchun biorektorlarda sovutish tizimi o‘rnatilgan bo‘lib, u orqali sovutilgan suv aylanadi.

Mazkur suv sovutish minoralarining ishga tushirilishi natijasida bioreaktorlarda kerakli haroratni saqlab turish imkoni yaratildi, bu esa ishlanishi murakkab bo‘lgan sulfidli maʼdanlarni oksidlashda yuqori ko‘rsatkichlarga erishish uchun muhim omil hisoblanadi. Ushbu loyihaning amalga oshirilishi biooksidlash jarayoni samaradorligini oshirish va oltin ajratib olish darajasini barqaror taʼminlashda ham muhim ahamiyatga ega.

“NKMK” AJ Matbuot xizmati