Bugun Navoiy shahrida buyuk mutafakkir, so‘z mulkining sultoni Alisher Navoiy tavalludining 580 yilligi munosabati bilan “Alisher Navoiy ijodiy merosining bashariyat maʼnaviy-maʼrifiy taraqqiyotidagi o‘rni” mavzusida IV xalqaro ilmiy-amaliy konferensiya o‘z ishini boshladi.

Mazkur nufuzli anjumanda AQSh, Kanada, Albaniya, Turkiya, Rossiya, Ozarbayjon, Qozog‘iston, Eron, Mongoliya, Tojikiston, Tatariston kabi davlatlari va respublikamizning barcha hududlaridan tashrif buyurgan navoiyshunos olimlar, ijodkor ziyolilar, maʼnaviyat sohasi fidoiylari, targ‘ibotchilar, faollar, nuroniylar, yoshlar, shu jumladan, Navoiy kon-metallurgiya kombinati vakillari ham qatnashmoqda.

Tadbir ishtirokchilari dastavval buyuk mutafakkir va shoir Alisher Navoiyning Navoiy shahridagi haykali poyiga gulchambar qo‘yib, allomaga alohida ehtirom ko‘rsatdilar.

00000024112

Shundan so‘ng Navoiy shahridagi “Maʼnaviyat va maʼrifat markazi”da xalqaro konferensiya o‘z ishini boshladi. Unda Navoiy viloyati hokimi vazifasini bajaruvchi N.Tursunov so‘z olib, Alisher Navoiy ijodining olamshumul ahamiyati, buyuk ajdodimiz jahon adabiyotining ulug‘ namoyondalari qatoridan munosib o‘rin olganligi, shoir dahosini ulug‘lash asnosida uning ijodini targ‘ib etish, milliy o‘zligimizni chuqur anglash, ajdodlarimiz yaratgan betakror ilmiy-ijodiy merosni chuqur o‘rganish, uni xalqimiz, ayniqsa, yoshlar ongiga singdirishda bu kabi nufuzli tadbirlarning o‘rni beqiyos ekanligini taʼkidladi.

Navoiy kon-metallurgiya kombinati bosh direktori, professor Q.Sanaqulov o‘z chiqishida turkiy tilda qisqa davrda “Xamsa”dek o‘lmas ijod namunasini yaratgan buyuk ajdodimiz Alisher Navoiyning insonni buyuklikka va ezgu ishlarga daʼvat etuvchi har bir asari xalqimiz barcha qatlamlari qalbiga kirib borishi va teran mazmun bilan ularning maʼnaviy olamini boyitishga erishish har qarz, ham farz ekanligini eʼtirof etdi. Shuningdek, Alisher Navoiy ijodiga bag‘ishlangan xalqaro konferensiyalarni o‘tkazish anʼana tusiga kirib borayotganligi, mamlakatimizda ulug‘ shoir ijodini o‘rganish, tadqiq qilishga alohida eʼtibor qaratilayotganligi shunday yaxshi niyat qilishga to‘la asos bo‘layotganini maʼlum qildi.

00000024114

Shuningdek, kombinat rahbari o‘z chiqishida Navoiy kon-metallurgiya kombinati jamoasining so‘nggi yillarda erishgan yutuqlari, ko‘pmillatli ahil jamoaning yaqin kelgusidagi rejalariga ham to‘xtalib, Qizilqum sahrosini o‘zlashtirayotgan minglab turli kasb egalari ulug‘ bobokalonimiz Alisher Navoiy orzularini ro‘yobga chiqarayotganliklarini zamonamiz Farhodlari o‘z Shirinlari bilan sahroda Navoiy, Zarafshon, Uchquduq kabi zamonaviy shaharlarni bunyod etganliklari, shuning bilan birga, kombinatda amalga oshirilayotgan maʼnaviy-maʼrifiy ishlarga ham to‘xtalib o‘tdi.

00000024115

Xalqaro konferensiyada Toshkent davlat sharqshunoslik universiteti rektori Gulchehra Rixsiyeva, Navoiy davlat pedagogika instituti rektori Bahodir Sobirov, Turkiyaning Eski Chanokkala universiteti rektori, professor Go‘zal Abdurahmon, Rossiya Federatsiyasi Sharq davlat muzeyi direktori o‘rinbosari Ilya Zaysev, Tojikiston Respublikasi Xo‘jand davlat universiteti dotsenti Baxtiyor Fayzulloyev, Ozarbayjon Milliy akademiyasi bo‘lim mudiri, professor Ulvi Almaz va boshqa navoiyshunos olimlar ham o‘z maʼruzalari bilan ishtirok etib, Navoiy ijodini o‘rganish borasida olib borilayotgan ilmiy izlanishlar, shoir hayoti va ijodiga bag‘ishlab tayyorlangan kitoblar haqida batafsil maʼlumot berishib, kitob nusxalarini A.Navoiy xalqaro jamg‘armasi va viloyat hokimligiga taqdim etdilar.

Shuni alohida taʼkidlash joizki, mazkur konferensiyani tashkil etishdan asosiy maqsad – jahon adabiyotining ulug‘ siymolaridan biri bo‘lgan buyuk mutafakkir ijodi, uning boy madaniy merosini keng targ‘ib etish, ilmiy jihatdan chuqur o‘rganish, nodir asarlarini yosh avlodga yetkazishga qaratilgan. Shuning bilan birga, ushbu nufuzli tadbirni anʼnaviy tarzda o‘tkazish orqali o‘zbek millati, barcha turkiy xalqlar iftixori, qolaversa, so‘z mulkining sultoni bo‘lgan shoir nomi bilan ataladigan shaharni jahon navoiyshunosligining ilmiy markaziga aylantirish ko‘zda tutilgan.

Tadbir ishtirokchilari uchun mutafakkir bobomiz tavalludi arafasida kombinat tashabbusi bilan chop etilgan hamda g‘azal va ruboiylaridan jamlangan “Quyoshliq istasang kasbi kamol et…” nomli kitobi ham tarqatildi.

Ayni paytda xalqaro konferensiya o‘z ishini davom ettirmoqda.

NKMK Matbuot markazi.