Mamlakatimiz iqtisodiyoti tarmoqlariga sun’iy intellekt texnologiyalarini keng joriy etishga qaratilgan O‘zbekiston Respublikasi Prezidentining 2025-yil 22-oktabrdagi “Sunʼiy intellekt texnologiyalarini yanada rivojlantirishga oid qoʻshimcha chora-tadbirlar toʻgʻrisida”gi Farmoni ijrosi doirasida “Navoiy kon-metallurgiya kombinati” AJda “Aileaders.uz” milliy ta’lim platformasida xodimlarni onlayn o‘qitish boshlandi.

Onlayn o‘qitish “Besh million sun’iy intellekt yetakchilari” dasturi bo‘yicha olib boriladi, uning maqsadi xodimlarda sun’iy intellekt va mashinada oʻqitish bo‘yicha asosiy ko‘nikmalarni shakllantirishdir. Bu tayyorgarlik Raqamli transformatsiya hamda 2025-2030-yilarda sunʼiy intellekt texnologiyalarini rivojlantirish dasturini amalga oshirishda muhim bosqich hisoblanadi.

Bir yil davomida dastur ishtirokchilari tomonidan sunʻiy intellekt asoslari, faoliyat samaradorligini oshirish uchun sunʻiy intellekt algoritmlaridan foydalanish tamoyillari va uni qoʻllash amaliyoti oʻzlashtiriladi. Onlayn o‘qitish formati orqali mutaxassislarga materiallarni oʻrganish uchun oʻzlariga qulay vaqtni mustaqil ravishda tanlash hamda amaliy vazifalar orqali olingan bilimlarni mustahkamlash imkoni beriladi.

“NKMK” AJ mamlakatimiz tog‘-kon sanoati samaradorligini oshirish uchun sun’iy intellekt tizimlarini keng qo‘llashga tayyor bo‘lgan professional muhitni shakllantirishni davom ettirmoqda.

“NKMK” AJ Matbuot xizmati