“O‘zbekiston – 2030 strategiyasi”ning ikkinchi yo‘nalishi barqaror iqtisodiy o‘sish orqali aholi farovonligini taʼminlash bo‘lib, buning uchun mamlakatimiz sanoatining “drayver” sohalarini rivojlantirish va hududlarning sanoat salohiyatini to‘liq ishga solish vazifasi belgilangan.

Mazkur hujjatdan “Navoiy kon-metallurgiya kombinati” AJga daxldor vazifalar o‘rin olgan. Xususan, “O‘zbekiston – 2030” strategiyasini “Atrof-muhitni asrash va “yashil iqtisodiyot” yili”da amalga oshirishga oid Davlat dasturining 4-ilovasi 8-bandida “NKMK” AJ tomonidan ESG hisobotlarini yuritish amaliyotini yo‘lga qo‘yish va jamoatchilikka oshkor etish, ESG-reytingini olish hamda 12-bandida “Muruntov” konini o‘zlashtirish investitsiya loyihasining navbatdagi bosqichlarini amalga oshirish belgilangan.

Xususan, Davlat dasturida belgilangan 8-band ijrosini taʼminlash maqsadida, yaqinda “NKMK” AJga “Sustainable Fitch” xalqaro reyting agentligi tomonidan ilk bor “3” darajasida umumiy 51 ball bilan korporativ ESG-reytingi berildi. Mazkur reytingni berish uchun agentlik kompaniyaning barqaror rivojlanish strategiyasi va tashabbuslari, korporativ boshqaruv amaliyotlari hamda uning ijtimoiy va ekologik taʼsirini har tomonlama baholadi.

Kombinat jamoasi hamisha davlat dasturlarida belgilangan vazifalarni muvaffaqiyatli amalga oshirib kelmoqda. Jumladan, “Atrof-muhitni asrash va “yashil iqtisodiyot” yili”da korxonada amalga oshirishga oid 14 ta bo‘lim, 32 ta banddan iborat 46,6 mlrd. so‘m va 13,2 mln. AQSh dollar sarflanishi ko‘zda tutilgan chora-tadbirlar dasturi amalga oshirilmoqda.

“NKMK” AJ Matbuot xizmati.