Atrof-muhitni muhofaza qilish va yashil hududlarni kengaytirishga hissa qo‘shish maqsadida Navoiy kon-metallurgiya kombinati jamoasi tomonidan “Yashil makon” umummilliy loyihasi doirasida 2025-yilning bahor mavsumida 102.8 gektar yer maydonlarida 300 ming tupdan ortiq manzarali va mevali daraxt hamda buta ko‘chatlari o‘tqazilishi rejalashtirilgan.

Xususan, Navro‘z umumxalq bayrami arafasida kombinat ishchi-xodimlari ishtirokida obodonlashtirish va ko‘kalamzorlashtirish ishlari amalga oshirildi. Karmana tumani hududidan o‘tuvchi M-37 avtomobil yo‘li bo‘yidagi 4,6 gektar yer maydonida NKMK ishchi-xodimlari tomonidan chinni gujum, qayrag‘och, katalpa, yasin kabi 7 ming tupga yaqin manzarali daraxt ko‘chatlari o‘tqazilib, “Yashil belbog‘” barpo etildi.

“NKMK” AJ Atrof-muhitni muhofaza qilish bo‘limi boshlig‘i Xayrullo Baqoyev takʼdlaganidek:

“Bugungi kunda Navoiy, Zarafshon, Uchquduq shaharlari, Zarkent va Marjonbuloq qo‘rg‘onlari, Nurota va Karmana tumanlari hamda kombinat konlari va korxonalari hududida 110 ming tupdan ortiq manzarali va mevali daraxt hamda buta ko‘chatlari o‘tqazildi. Joriy yilning bahor mavsumida 76.5 gektar yer maydonlarida tomchilatib sug‘orish tizimi tashkil etiladi.”

“Yashil makon” umummilliy loyihasi doirasida “Yashil belbog‘”larni tashkil etishdan asosiy maqsad mamlakatimizda yashillik darajasini oshirish, kelajak avlodga munosib ekologik sharoit yaratishdir.

“NKMK” AJ Matbuot xizmati.