Navoiy kon-metallurgiya kombinatining mineral resurs bazasini tashkil etadigan qimmatbaho metallar qazib olinadigan kon va karyerlarning aksariyati Qizilqum sahrosi kengliklarida joylashgan.

Tomdi tumanidagi “Balpantov” karyeri Markaziy kon boshqarmasiga qarashli istiqbolli konlardan biri bo‘lgan “Beshapantov” koni tarkibiga kiradi. Mazkur karyerda 2022-yildan boshlab oltin tarkibli maʼdan qazib olish ishlari amalga oshirilmoqda.

“Beshapantov” koni bosh muhandisining kon ishlari bo‘yicha o‘rinbosari Furqat Jumayevning maʼlum qilishicha:

“Bugungi kunda “Balpantov” karyerida murakkab kon-geologik tuzilishga ega maʼdanlarni qazib olish ishlari olib borilmoqda. Bu ishlarga zamonaviy burg‘ulash uskunalari, gidravlik ekskavatorlar, avtoag‘dargichlar kabi og‘ir konchilik texnikalaridan keng foydalanilmoqda. Qazib chiqarilayotgan tog‘ jinslari temir yo‘l orqali 2-gidrometallurgiya zavodiga qayta ishlash uchun tashilyapti. Kelajakda ushbu karyerning uzunligi qariyb 1 370 metr, eni 1 350 metr va chuqurligi 200 metrni tashkil etadi. Karyerda yiliga 10 mln. kubometr tog‘ jinslari qazib olinishi rejalashtirilgan.”

Ushbu istiqbolli konda olib borilayotgan ishlar kombinatda qimmatbaho metallarni ishlab chiqarish hajmini oshirishga xizmat qilmoqda.

“NKMK” AJ Matbuot xizmati.