Navoiy davlat konchilik va texnologiyalar universiteti Navoiy kon-metallurgiya kombinati uchun muhandis-texnik mutaxassislarni tayyorlash bo‘yicha respublikamizdagi asosiy oliy taʼlim muassasi hisoblanadi. Joriy o‘quv yilida mazkur oliy taʼlim muassasida sanoat ishlab chiqarishini mahalliylashtirish kafedrasi o‘z faoliyatini boshladi.

Kafedraning asosiy maqsadi mahalliylashtirish sohasida materialshunoslik (materiallar va ulardan foydalanish fani), mexatronika (sunʼiy intellekt tomonidan boshqariladigan mashinalarni o‘rganish va yaratish) va robototexnika (har qanday jarayonlarni avtomatlashtirishga qodir robotlar va robotlashtirilgan tizimlarni ishlab chiqish va tayyorlash) kabi yo‘nalishlar bo‘yicha yuqori malakali mutaxassislarni tayyorlashdan iboratdir.

Ushbu kafedrada reinjiniring, additiv texnologiyalar va innovatika kabi fanlar o‘qitilmoqda. O‘quv dasturi dunyoning yetakchi universitetlari o‘quv dasturlari asosida ishlab chiqilgan bo‘lib, talabalarni xalqaro texnologik darajaga olib chiqishga qaratilgan. Mahalliylashtirish kafedrasining professor-o‘qituvchilari orasida uch nafari professorlar, to‘rt nafari ingliz tilini biladigan fan nomzodlari va doktorlaridir.

Kafedra tomonidan kelgusida “Navoiy kon-metallurgiya kombinati” AJda ishlab chiqarish ehtiyojlari uchun xorijdan import qilinayotgan ehtiyot qismlar va mexanizmlarni mahalliylashtirish bo‘yicha keng ko‘lamli ishlarni amalga oshirish rejalashtirilgan. Shu sababli mahalliylashtirish kafedrasining asosiy qismi kombinatning Navoiy mashinasozlik zavodi hududida joylashdi. Bu talabalarga sanoat loyihalarida bevosita ishtirok etish imkonini beradi.

Xususan, NMZ Markaziy zavod laboratoriyasi boshlig‘i Rustam Xamdamov taʼkidlaganidek:

“Zavod hududida mahalliylashtirish kafedrasining tashkil etilishi muhim ahamiyatga ega, chunki korxonamiz konchilik sanoati uchun import o‘rnini bosuvchi qismlar va mexanizmlarni ishlab chiqarish bo‘yicha katta tajribaga ega. Jumladan, talabalarga ishlab chiqarish jarayonlarini to‘g‘ridan to‘g‘ri amaliyotda ko‘rsatish imkoniyati mavjud. Kafedrada zamonaviy asbob-uskunalar bilan jihozlangan o‘quv xonasi va laboratoriya mavjud. Laboratoriyani jihozlash ishlari davom etadi.”

Yangi kafedrada darslar universitet o‘qituvchilari bilan birga ishlab chiqarish mutaxassislari tomonidan ham olib borilmoqda. Talabalar xom ashyodan to tayyor mahsulotni olishgacha bo‘lgan ishlab chiqarishning barcha jarayonlari bilan amalda tanishtirilmoqda. Shunday qilib, talabalarda Navoiy mashinasozlik zavodi sexlarida olib borilayotgan ishlarda qatnashish va zavod laboratoriyasida tahlillar qanday o‘tkazilishini kuzatish imkoniyati mavjud.

Ishlab chiqarish jarayonlariga innovatsion texnologiyalarni joriy etish hamda muhandislik mutxassisligining nufuzi va jozibadorligini oshirishga ko‘maklashish fan va ishlab chiqarish integratsiyasining ajralmas qismidir.

“NKMK” AJ Matbuot xizmati.