Bugun Navoiy shahridagi “Farhod” madaniyat saroyida “NKMK” AJ ayollar Kengashi va “Oila” ilmiy, ijtimoiy va gumanitar tashabbuslar Markazi nodavlat notijorat tashkiloti hamkorligida kombinat xotin-qizlari ishtirokida uchrashuv bo‘lib o‘tdi.

“Navoiy kon-metallurgiya kombinati jamoasining O‘zbekiston Respublikasining gender siyosati bo‘yicha huquqiy savodxonligini oshirish” mavzusida tashkil etilgan tadbirda O‘zbekiston Respublikasi Oliy majlisi Senatining Yoshlar, madaniyat va sport masalalari qo‘mitasi raisi o‘rinbosari, senator Diloram Tashmuxamedova, kombinat rahbariyati, markaz direktori o‘rinbosari Dilbar Alimjanova hamda korxonaning faol ayollari ishtirok etishdi.

Uchrashuvda gender tenglikni taʼminlash masalasida mamlakatimizda amalga oshirilayotgan ishlar, xotin-qizlar va erkaklar uchun teng huquq hamda imkoniyatlarni taʼminlash, xotin-qizlarni ijtimoiy-huquqiy jihatdan qo‘llab-quvvatlash, jamiyat va davlat boshqaruvida ularning teng ishtirok etishiga erishish kabi masalalar bo‘yicha fikr-mulohazalar bildirildi. Ochiq muloqot tarzida bo‘lib o‘tgan uchrashuvda qatnashchilar mavzu doirasida o‘zlarining taklif, fikr va mulohazalarini bildirib, qiziqtirgan savollariga batafsil javoblar olishdi.

Yakunda umumiy maqsadlardan kelib chiqib, “NKMK” AJ va “Oila” ilmiy, ijtimoiy va gumanitar tashabbuslar Markazi NNT o‘rtasida o‘zaro hamkorlik memorandumi imzolandi. Tomonlar xotin-qizlarning imkoniyatlarini kengaytirish, gender tenglikni taʼminlash yuzasidan vazifalarni birgalikda hal etishga kelishib oldilar.

Mazkur hamkorlik xotin-qizlarning muammolarini aniqlash, huquqlari va qonuniy manfaatlarini taʼminlash, ularning faolligini oshirishga xizmat qilishi bilan ahamiyatlidir.

“NKMK” AJ Matbuot xizmati.