Navoiy kon-metallurgiya kombinatida xomashyo zaxiralarini qidirish va aniqlash bo‘yicha ishlarni amalga oshirish Geologiya-qidiruv ekspeditsiyasi zimmasiga yuklangan. Bugungi kunda geologiya-qidiruv ishlarining samaradorligi nafaqat yer qaʼridan olingan namunalar soni, balki ularni qanchalik tez, aniq va ishonchli tahlil qilish imkoniyati bilan belgilanadi.

O‘zbekiston Respublikasi davlat mustaqilligining 35 yilligi munosabati bilan bugun Geologiya-qidiruv ekspeditsiyasida Namuna-tahlil laboratoriyasi foydalanishga topshirildi. Yangi laboratoriya zamonaviy asbob-uskunalar, raqamli boshqaruv yechimlari, namuna olish tezkorligi asosida tashkil etilgan.

Mazkur laboratoriya ochilishiga bag‘ishlab o‘tkazilgan tadbirda “Navoiy kon-metallurgiya kombinati” AJ rahbariyati, Geologiya-qidiruv ekspeditsiyasi ishchi-xodimlari ishtirok etishdi. Tadbirda Mustaqillik bayrami munosabati bilan bir guruh ishchi-xodimlar, quruvchilar tashakkurnoma va esdalik sovg‘alar bilan rag‘batlantirildi.

Tadbirda taʼkidlanganidek, ushbu laboratoriyaning ishga tushirilishi korxonada burg‘ilash ishlaridan tortib, namuna tahlilini 3D modellashtirish va zaxiralarni aniq baholashgacha bo‘lgan yagona texnologik zanjir yaratish, “raqamli geologiya”dan “aqlli geologiya”ga o‘tish yo‘lidagi muhim qadam bo‘lib xizmat qiladi. Laboratoriya bir sutkada 400 tagacha geologik namunani qisqa muddatda tahlil qilish quvvatiga ega.

Geologiya-qidiruv ekspeditsiyasida birlamchi geologik hujjatlarni to‘plash va tahlil qilish, mahalliy geologik maʼlumotlar bazasini yaratish va raqamlashtirish, mineral resurslarni baholash jarayonlarida “Micromine”, “Geobank” va “Leapfrog” kabi zamonaviy dasturiy mahsulotlardan foydalanilmoqda. Shuningdek, zaxiralarni xalqaro amaliyotda keng qo‘llaniladigan “JORC Code” hisobot standartlari asosida baholashga alohida eʼtibor berilmoqda. Yangi laboratoriya olingan natijani yagona geologik axborot tizimining muhim qismi sifatida tahlil qilish imkonini yaratadi. Namuna olinishidan boshlab, uning tahlil natijasi, geografik koordinatasi, geologik tavsifi va modeldagi o‘rnigacha bo‘lgan maʼlumotlarni o‘zaro bog‘liq holda shakllantirish zamonaviy geologiyaning asosiy talablaridan biridir. Buning evaziga mutaxassislar katta hajmdagi maʼlumotlarni tezkor solishtirish, tahlil qilish, istiqbolli maydonlarni aniqlash, uch o‘lchovli geologik modellarni shakllantirish va mineral resurslarning istiqbolini yanada aniq baholash imkoniga ega bo‘ladi. Ushbu zamonaviy laboratoriyaning ishga tushirilishi natijasida 50 dan ortiq yangi ish o‘rinlari yaratildi.

Bir so‘z bilan aytganda, geologiya-qidiruv ishlari samaradorligi oshirish, yer qaʼridan olingan namunalarni tez, aniq va ishonchli tahlil qilishda bu laboratoriya muhim ahamiyatga ega.

“NKMK” AJ Matbuot xizmati