Germaniya Federativ Respublikasining O‘zbekiston Respublikasidagi Favqulodda va Muxtor elchisi Manfred Xuterer 23-fevral kuni Navoiy kon-metallurgiya kombinatiga tashrif buyurdi.

“NKMK” AJ bosh muhandisi A.Ravshanov va Germaniya elchisi M.Xuterer o‘rtasida uchrashuv bo‘lib o‘tdi. Uchrashuv davomida kombinat tarixi, faoliyati hamda keyingi yillarda amalga oshirilgan xalqaro hamkorlik to‘g‘risida maʼlumot berildi.

Muzokaralarda kombinat va Germaniya kompaniyalari o‘rtasidagi hamkorlik, tog‘-kon sanoati uchun malakali muhandis kadrlar tayyorlash yo‘nalishida Navoiy davlat konchilik va texnologiyalar universiteti hamda Germaniya oliy taʼlim muassasalari o‘rtasida yo‘lga qo‘yilgan hamkorlikni yanada rivojlantirish yuzasidan o‘zaro fikr almashildi.

Shuningdek, Germaniya elchisi M.Xuterer “Muruntov” koniga tashrif buyurib, konda tog‘ jinslarini qazish va tashish jarayoni, zamonaviy konchilik texnikalarining ishlashi bilan yaqindan tanishdi.

“NKMK” AJ Matbuot xizmati