Navoiy kon-metallurgiya kombinatida jismoniy va yuridik shaxslarning murojaatlari bilan ishlash bo‘yicha o‘ziga xos tizim yaratilib, muammolarni joyiga borib o‘rganish, har bir murojaatni o‘z vaqtida ko‘rib chiqishga alohida e’tibor qaratib kelinmoqda.

Kombinat va uning bo‘linmalari rahbarlarining jismoniy va yuridik shaxslar qabulini tashkil etish samarali yo‘lga qo‘yilgan. Murojaatlarni ko‘rib chiqish natijalari doimiy tahlil etilib, muhokama qilib borilmoqda. Bu o‘z navbatida hududlarni ijtimoiy-iqtisodiy rivojlantirish, bandlikni ta’minlash, ifratuzilmani yaxshilash barobarida aholi turmush farovonligini yanada oshirish imkonini berishi bilan ahamiyatlidir.

Jumladan, 2024-yilning 9 oyida kombinatga yozma, og‘zaki va elektron ko‘rinishda, O‘zbekiston Respublikasi Prezidentining Virtual va Xalq qabulxonalari orqali to‘g‘ridan-to‘g‘ri yo‘llangan 3 347 ta murojaat kelib tushgan. Agarda, bu raqamni 2023-yilning 9 oyligiga taqqoslaydigan bo‘lsak, murojaatlar o‘tgan yilga nisbatan 22 foizga ko‘payganligini ko‘rish mumkin.

Har bir murojaat ortida inson taqdiri, uning manfaati yotadi. Odamlar amalga oshirilayotgan islohotlar natijasini hayotida erta yoki indinga emas, bugun ko‘rishni istaydi. Xalq bilan bevosita muloqot davomida ularning dardu-tashvishlari, qanday ijtimoiy, ma’naviy-maishiy yordamga muhtojligini o‘rganish borasida hududlardagi Ixtisoslashtirilgan prokuraturalar va NKMK IIB bilan hamkorlikda Markaziy, Shimoliy va Janubiy kon boshqarmalarida ham sayyor qabullar o‘tkazib kelinmoqda. Fuqarolarimizning emin-erkin hayot kechirishi, ishlashi, o‘qishi, tinch-osoyishtaligi ko‘p jihatdan ularning muammolari ijobiy hal etilishiga bog‘liq. Shu boisdan murojaatlarda ko‘tarilgan masalalarning yechimi borasida hamkorlik qilinmoqda.

Kombinat rahbariyatining o‘tgan to‘qqiz oyda Markaziy, Shimoliy va Janubiy kon boshqarmalarida jismoniy va yuridik shaxslar vakillari bilan sayyor qabullarida 50 nafar fuqaro qabul qilinib, ularning murojaatlari yuzasidan amaliy yordamlar ko‘rsatildi.

Murojaatlarning 392 tasini og‘zaki, 677 tasini yozma va 2 278 tasini elektron murojaatlar tashkil etadi. Yozma murojaatlarning 129 tasi ijobiy hal qilinib, 518 tasi bo‘yicha zaruriy tushuntirishlar berildi hamda 30 tasi ayni paytda o‘rganish jarayonida.

O‘zbekiston Respublikasi Prezidentining Virtual qabulxonasi orqali 2 166 ta murojaat kelib tushgan bo‘lib, ularning 1 628 tasi qanoatlantirilib, 230 tasiga tushuntirish berildi.

Yana shuni alohida ta’kidlash joizki, fuqarolar “NKMK” AJning Internet tarmog‘idagi Virtual qabulxonasi hamda Telegramm messenjerdagi maxsus bot orqali ham o‘z murojaatlarini onlayn rejimda yo‘llashlari mumkin. Har kuni mazkur interaktiv platformalar orqali kelib tushgan murojaatlar o‘rnatilgan tartibda ko‘rib chiqilib, murojaat egalariga huquqiy tushuntirishlar berilmoqda.

Davr talabidan kelib chiqib, murojaatlar bilan ishlashni yanada yaxshilash, imkon qadar fuqarolarning muammolarini hal etishga ko‘maklashish asosiy vazifamiz bo‘lib qolaveradi. Zero, bu fuqarolarning farovon hayot kechirishlarini ta’minlashga xizmat qiladi.

Shavqiddin IDIYEV,

“NKMK” AJ Jismoniy va yuridik shaxslarning

murojaatlariga oid ishlarni nazorat qilish va

muvofiqlashtirish bo‘limi boshlig‘i.