“Hojibo‘g‘ot” karyeri – Shimoliy kon boshqarmasiga qarashli “Dovg‘iztov” koni tarkibidagi istiqbolli konlardan biridir.

Bugungi kunda ikki yuz nafardan ortiq ishchi-xodim faoliyat olib borayotgan mazkur karyerda tog‘ jinslarini qazish va tashish ishlari Navoiy kon-metallurgiya kombinatida amalga oshirilayotgan “Qoqpatas va Dovg‘iztov oltin konlarida maʼdan qazib olish (III navbati)” investitsion loyihasi doirasida bajarilmoqda.

Karyerda konchilik ishlarini o‘z vaqtida bajarish uchun burg‘ilash uskunalari, ekskavatorlar, yuklagichlar, avtoag‘dargichlar kabi zamonaviy konchilik texnikalaridan keng foydalanilmoqda. O‘tgan yilda 10 mln. kubometrdan ortiq tog‘ jinslari qazib olingan bo‘lsa, joriy yilda bu ko‘rsatkichni qariyb 13 mln. kubometrga yetkazish rejalashtirilgan. Qazib olinayotgan oltin tarkibli maʼdan temir yo‘l orqali 5 va 3-gidrometallurgiya zavodlariga qayta ishlash uchun yetkazilyapti.

“NKMK” AJ Matbuot xizmati