Navoiy shahridagi “NKMK tarixi” muzeyida Navoiy kon-metallurgiya kombinati, Navoiy davlat konchilik va texnologiyalar universiteti hamda viloyat Oila va xotin-qizlar boshqarmasi hamkorligida “Ilm-fan va texnologiyalarni rivojlantirishda ayollarning o‘rni” mavzusida anjuman tashkil etildi.

Mazkur anjumanda O‘zbekistonning bir qator oliy ta’lim muassasalari hamda Qozog‘istondan tashrif buyurgan olima ayollar va xotin-qizlar qatnashdi. Ishtirokchilar ilm-fan va texnologiyalarni rivojlantirishda ayollarning o‘rni, gender tenglikni ta’minlash, yashil iqtisodiyot, Navoiy viloyatida ekologik turizmni rivojlantirish masalalari bo‘yicha taqdimotlar o‘tkazishdi.

Anjumanda taʼkidlanganidek, bugungi kunda “NKMK” AJda 6 147 nafar xotin-qizlar faoliyat olib bormoqda. Shulardan, oliy maʼlumotli mutaxassislar 1 324 nafar, 30 yoshgacha bo‘lgan yoshlar 1 135 nafar, rahbarlar 269 nafar, davlat mukofotlari sohiblari 40 nafarni tashkil etadi.

Shuningdek, tadbirda ayollar va qizlarning ilmiy ishlanmalar va innovatsiyalarni yaratishdagi rolini yanada kuchaytirish vazifalari ham muhokama qilindi. Yakunda mas’ul tashkilotlar hamda oliy ta’lim muassasalari olima ayollari o‘rtasida tajriba almashish va hamkorlikni tizimli yo‘lga qo‘yish bo‘yicha kelishuvlarga erishildi.

“NKMK” AJ Matbuot xizmati.