23-sentabr kuni “Navoiy kon-metallurgiya kombinati” AJda 2025-yil birinchi yarim yillikdagi ishlab chiqarish va moliyaviy natijalar yuzasidan ilk marotaba kompaniyaning xalqaro korporativ obligatsiyalarini xarid qilgan investorlar bilan videokonferens aloqa orqali muloqot o‘tkazildi.

Mazkur tadbir ilg‘or xalqaro amaliyotlarni tadbiq etish, axborot shaffofligini taʼminlash, investorlar va keng investitsion hamjamiyat bilan samarali muloqotni yo‘lga qo‘yish maqsadida tashkil etildi.

Videokonferens aloqa orqali muloqotda “NKMK” AJ Boshqaruvi raisi – Bosh direktori Q.Sanaqulov, bosh direktorning transformatsiya bo‘yicha birinchi o‘rinbosari E.Antonov hamda bosh direktorning iqtisod va moliya bo‘yicha o‘rinbosari J.Xasanovlar ishtirok etishdi.

Kompaniya rahbariyati tomonidan 2025-yil birinchi yarim yillik uchun Moliyaviy hisobotning xalqaro standartlari (MHXS) bo‘yicha moliyaviy natijalar taqdim etildi, transformatsiya dasturining amalga oshirilishi haqida maʼlumot hamda investorlar va tahlilchilarning savollariga javoblar berildi.

“NKMK” AJ Boshqaruvi raisi – Bosh direktori Q.Sanaqulov taʼkidlaganidek:

“Kompaniyamiz faoliyati natijalarini ochiq formatda taqdim etish imkoniyatini yuqori baholaymiz. Bu bizning investorlar oldidagi shaffoflik va masʼuliyat tamoyillariga amal qilishimizning ifodasidir. Bunday tadbirlarni o‘tkazish kompaniyamizning kommunikatsion siyosati va manfaatdor tomonlar bilan o‘zaro hamkorligi uchun muhim ahamiyat kasb etadi.”

Tadbir natijalari bo‘yicha qisqacha taqdimot korporativ veb-saytning “Investorlarga” bo‘limida joylashtirilgan.

“NKMK” AJ Matbuot xizmati