Navoiy kon-metallurgiya kombinatining gidrometallurgiya zavodlarida laboratoriyalar faoliyati yo‘lga qo‘yilgan bo‘lib, ularning har biri aniq belgilangan vazifalarni bajarib kelmoqda.

Xususan, 2-gidrometallurgiya zavodining markaziy laboratoriyasida korxonada tarkibida qimmatbaho metallar bo‘lgan maʼdanni qayta ishlash bo‘yicha qo‘llanilayotgan texnologik jarayonlarni takomillashtirish va yangi texnologiyalarni ishlab chiqarishga joriy etishga yo‘naltirilgan ilmiy-tadqiqot ishlari amalga oshiriladi.

Bugungi kunda mazkur laboratoriya tarkibida beshta guruh mavjud bo‘lib, unda 180 nafardan ortiq malakali mutaxassis va laborantlar faoliyat olib borishmoqda. Laboratoriyada bir sutkada o‘rtacha 70-80 ta qum namunasi, 50 ta ko‘mir va ko‘mir kukuni namunasi, 12 ta katod cho‘kmasi ustida tahlil o‘tkazilib, oltin miqdori aniqlanadi. Spektral tahlil usuli yordamida texnologik jarayondan olingan qariyb 5 mingta namuna tarkibi o‘rganilib, suyuq fazada mavjud bo‘lgan oltin va boshqa qimmatbaho metallar aniqlanadi.

- Laboratoriyamiz O‘zbekiston texnik jihatdan tartibga solish agentligining akkreditatsiya tizimi talablariga to‘liq javob beradi. Tahlillar respublikamizda ruxsat etilgan xalqaro va davlat standartlari asosida amalga oshirilmoqda. Taʼkidlash kerakki, laboratoriyada olib borilayotgan namunalar tahlili va zavodda ishlab chiqarilayotgan oltin quymalari muntazam ravishda London oltin quymalari bozori assotsiatsiyasi (LBMA – London Bullion Market Association)ning test sinovlarida muvaffaqiyatli tasdiqlanmoqda, - deydi 2-GMZ markaziy laboratoriyasi boshlig‘i Shuhrat Toshmuratov.

Laboratoriya mutaxassislari zavod sexlarida amalga oshiriladigan ishlab chiqarish jarayonlarida faol ishtirok etib, sifatli mahsulot tayyorlashda muhim o‘rin tutadi.

“NKMK” AJ Matbuot xizmati