Kombinat boshqarmasida “Navoiy kon-metallurgiya kombinati” AJ rahbariyati va mutaxassislari hamda korporativ axborot tizimlarini ishlab chiqish va joriy etishga ixtisoslashgan “Expera Digital IT Consulting” MChJ vakillari o‘rtasida uchrashuv o‘tkazildi.

Uchrashuvda biznes jarayonlari samaradorligini oshirish, resurslarni boshqarishni optimallashtirish va korxona faoliyati shaffofligini taʼminlashga qaratilgan jahon darajasidagi ERP-tizimini joriy etish istiqbollari muhokama etildi.

“NKMK” AJ xalqaro kapital bozoriga faol integratsiyalashmoqda, bu esa Moliyaviy hisobotning xalqaro standartlari (MHXS) bo‘yicha moliyaviy hisobotlarni tayyorlash jarayonlarini talab etmoqda. Uchrashuvda moliyaviy boshqaruv, ombor logistikasi, ishlab chiqarish jarayonlari, boshqaruv hisobi va tahlili, MHXS bo‘yicha hisobotlarni shakllantirishni o‘z ichiga olgan ERP-tizimining asosiy funksional imkoniyatlari namoyish etildi.

Shuningdek, avtomatlashtirilgan yechimlarni joriy etish eng katta samara keltiradigan sohalar ko‘rsatib o‘tildi. Tizimning modulli arxitekturasiga alohida eʼtibor qaratildi. Bu – uni kombinatning o‘ziga xos biznes jarayonlariga moslashtirishga imkon beradi.

Shu bilan birga, tomonlar loyihaoldi tayyorgarlik, tajriba-sinov va xodimlarni o‘qitish bosqichlarini o‘z ichiga olgan ERP-tizimini joriy etish bo‘yicha dastlabki yo‘l xaritasini muhokama qildilar.

“NKMK” AJ Matbuot xizmati