Bugun Navoiy shahridagi “Farhod” madaniyat saroyida “Navoiy kon-metallurgiya kombinati” AJda 2024-yilda Jamoa shartnomasi majburiyatlari bajarilishi hamda 2025-2027-yillarga mo‘ljallangan Jamoa shartnomasini qabul qilishga bag‘ishlangan konferensiyasi bo‘lib o‘tdi.

Bo‘linmalardan 400 nafar delegat ishtirok etgan konferensiyada kombinatda 2024-yilda Jamoa shartnomasi majburiyatlari bajarilishi to‘g‘risida “NKMK” AJ Boshqaruvi raisi – Bosh direktori Q.Sanaqulov va NKMK xodimlari kasaba uyushmasi Kengashi raisi I.Rahmatovlarning hisobotlari tinglandi. Maʼruzachilar o‘z chiqishlarida 2024-yilda ishlab chiqarish rejalari bajarilishi, ishchi-xodimlarni ijtimoiy himoya qilish, rag‘batlantirish, munosib ish sharoitlari yaratilishi bo‘yicha fikr-mulohazalarini bildirib o‘tishdi.

Shuningdek, kombinatda 2024-yilda mehnat muhofazasi bo‘yicha Kelishuvning bajarilishi va 2025-yil uchun mehnat muhofazasi bo‘yicha Kelishuvni qabul qilish bo‘yicha Mehnat muhofazasi, sanoat xavfsizligi va ekologiya bo‘yicha direktor A.Cherdansev, kombinatda Jamoa shartnomasi majburiyatlarini 2024-yilda bajarilishini tekshirish va kombinat ichki mehnat tartib qoidalariga o‘zgartirish va qo‘shimchalar kiritish yuzasidan “NKMK” AJ bosh direktorining iqtisod va moliya bo‘yicha o‘rinbosari J.Xasanov hamda 2025-2027-yillarga mo‘ljallangan Jamoa shartnomasini qabul qilish yuzasidan Kasaba uyushmasi Kengashi raisi I.Rahmatovlarning hisobotlari eshitildi.

Konferensiya kun tartibi muhokamasida delegatlar faol ishtirok etib, o‘z fikr-mulohazalarini bildirdi. Muzokara va muhokamalarda ishtirokchilar tomonidan Jamoa shartnomasining 2024-yilda bajarilishi qoniqarli, deb baholandi.

2025-2027-yillarga mo‘ljallangan Jamoa shartnomasi tegishli qo‘shimcha va o‘zgartirishlar bilan bir ovozdan maʼqullanib qabul qilindi.

“NKMK” AJ Matbuot xizmati