“Navoiy kon-metallurgiya kombinati” AJda kadrlarni tayyorlash bo‘yicha mamlakatimiz oliy taʼlim muassasalari bilan hamkorlik tizimli yo‘lga qo‘yilgan. Navoiy davlat konchilik va texnologiyalar universiteti esa kombinat korxonalari uchun soha mutaxassislarini tayyorlashda yetakchi oliy o‘quv yurti hisoblanadi.

Joriy o‘quv yilidan boshlab kombinat va universitet o‘rtasida yo‘lga qo‘yilgan “Kasb egasi” dual taʼlim tizimi asosida 4-bosqich talabalari amaliyoti korxona bo‘linmalarida olib borilmoqda. Bugungi kunda 150 nafar universitet talabasi dual taʼlim asosida onlayn o‘qib, Markaziy kon boshqarmasi bo‘linmalarida faoliyat olib borishmoqda. Talabalar nazariy bilimlarni amaliyotda yanada mustahkamlab, bevosita ish joyida kasbga doir amaliy ko‘nikmalarga ham ega bo‘lishmoqda.

Xususan, joriy yilda dual taʼlim asosida Zarafshon taʼmirlash-mexanika zavodiga Navoiy davlat konchilik va texnologiyalar universiteti talabalarining 14 nafari suhbat asosida ishga qabul qilindi. Ayni vaqtda ular tokar, taʼmirlovchi-chilangar, elektrgazpayvandchi, montajchi, qo‘rg‘oshin-qalay qotishmalarini quyuvchi kabi kasblarda kunduzgi va kechki smenalarda ishlab kelmoqda. Ularga malakali mutaxassislar ustoz sifatida biriktirilgan. Ayrimlari 2024-yilning yozgi amaliyotini zavodda o‘taganliklari bois, shu davrda kerakli ko‘nikmalarni egallagan. Talabalar mustaqil ish olib bormayotgan bo‘lsalarda, ustozlari bilan birgalikda Markaziy kon boshqarmasi bo‘linmalaridan kelgan buyurtmalar asosida nasoslarni yig‘ish, ehtiyot qismlarni yasash, texnologik uskunalarni montaj qilish kabi ishlarni bajarmoqda.

NDKTU “Mashinasozlik texnologiyasi” yo‘nalishi 4-bosqich talabasi Jahongir Oblaqulov taʼkidlaganidek:

“Joriy yilning fevral oyida universitetimizda kombinat hamkorligida dual taʼlim asosida ishga qabul qilish bo‘yicha uchrashuv bo‘lib o‘tdi. Ana shu uchrashuvda men suhbat orqali Zarafshon taʼmirlash-mexanika zavodiga ishga qabul qilindim. Hozirda dual taʼlim tizimi asosida onlayn o‘qib, zavodda tokar vazifasida ham ishlayapman. Shu bilan birga zavodning malakali mutaxassislaridan kasb sir-asrorlarini o‘rganmoqdaman.”

Kombinat korxonalariga ishga qabul qilingan bu talabalarga ish joyiga qatnashi uchun korxona tomonidan transport ajratilgan, tushlik tashkillashtirilgan va belgilangan miqdorda oylik ish haqi ham to‘lanmoqda. Asosiysi, zamonaviy dastgohlarda ishlashni o‘rgangan, mehnat jamoasi va ish uslubi bilan yaqindan tanishgan, mehnat sharoitiga moslashgan talabalar o‘qishni bitirgandan so‘ng shu korxonalarga ishga qabul qilinishi muhim ahamiyatga ega.

“NKMK” AJ Matbuot xizmati