Mamlakatimiz kino sohasi vakillaridan tashkil topgan Madaniyat vazirligi huzuridagi Kinematografiya agentligi delegatsiyasi 7-noyabr kuni Navoiy kon-metallurgiya kombinatiga tashrif buyurdi.

Kinematografiya agentligi delegatsiyasi “NKMK tarixi” muzeyida bo‘lib, kombinat tarixi, keyingi yillarda ishga tushirilgan yangi korxonalar hamda noyob tabiiy qazilmalarga boy Qizilqum zaminining qadimiy tarixi va buguni bilan yaqindan tanishishdi.

Navoiy shahridagi “Farhod” madaniyat saroyida “NKMK” AJ Boshqaruvi raisi – Bosh direktori Q.Sanaqulov va Kinematografiya agentligi direktori Sh.Rizayev boshchiligidagi delegatsiya vakillari o‘rtasida uchrashuv o‘tkazildi.

Uchrashuvda O‘zbekiston Respublikasi Prezidentining 2024-yil 5-iyunda qabul qilingan “Kinematografiya sohasini yana-da rivojlantirish hamda mamlakatimiz tarixiga bag‘ishlangan filmlar turkumini yaratishga doir chora-tadbirlar to‘g‘risida”ni Qarori bilan tasdiqlangan 2024-2027-yillarga mo‘ljallangan “Tirik tarix” filmlar turkumini yaratish dasturi ijrosini taʼminlash bo‘yicha rejalashtirilgan ishlar muhokama etildi. Xususan, “Tirik tarix” filmlar turkumi dasturiga 54 ta kinoloyiha kiritilgan bo‘lib, shundan 21 tasi badiiy, 33 tasi badiiy-publitsistik filmdir.

Uchrashuv yakuni bo‘yicha mazkur dastur ijrosini taʼminlash, xalqimiz uchun tarixiy filmlarni yaratish bo‘yicha Kinematografiya agentligi va “Navoiy kon-metallurgiya kombinati” AJ o‘rtasida hamkorlik memorandumi imzolandi.

“NKMK” AJ Matbuot xizmati