Hozirgi kunda “Navoiy kon-metallurgiya kombinati” AJda 2 ta Avtomobil transporti boshqarmasi, 17 ta avtokorxona va avtotransport ta’mirlash sexi faoliyat olib borayapti. 4 mingdan ziyod turli rusumdagi avtotransport vositalari va mexanizmlar ishlab chiqarish rejalarini bajarishga safarbar etilgan.

2024-yil boshidan buyon og‘ir yuk tashuvchi va tog‘-kon texnikalari tarkibi muntazam yangilanib borilayapti. Yuk ko‘tarish quvvati 220 tonna bo‘lgan 15 ta “CAT” va yurtimizga birinchi marta yuk ko‘tarish quvvati 254 tonna bo‘lgan “Komatsu” rusumli 4 ta avtoag‘dargich keltirildi.

Joriy yilda zavod va konlar, ayniqsa avtomobil transporti xo‘jaliklarida mavjud ishlab chiqarish quvvatlari barqarorligini ta’minlash va yangi loyihalarni amalga oshirish maqsadida investitsion loyihalar doirasida yuk ko‘tarish quvvati 55 tonnadan 225 tonnagacha bo‘lgan avtoag‘dargichlardan 100 taga yaqin, avtogreyder, frontal yuklagich, g‘ildirakli va zanjirli buldozer kabi yo‘l-qurilishi mashinalaridan 40 taga yaqin, ixtisoslashtirilgan transport vositalaridan 30 ta xarid qilish rejalashtirilgan.

Mazkur avtoag‘dargichlar zamonaviy bort kompyuterlari bilan jihozlangan bo‘lib, ulardagi maxsus moslama ish jarayonida yuzaga kelishi mumkin bo‘lgan nosozliklar haqida alohida belgilagan kodlar orqali tezkor ma’lumot taqdim etadi. Bunday ulkan va zamonaviy transport vositalarini ta’mirlash va ularga texnik xizmat ko‘rsatish ishlari Avtomobil transporti boshqarmalarida to‘laqonli amalga oshirilmoqda.

Ishlab chiqarish jarayonida zamonaviy, yuqori yuk ko‘tarish quvvatiga ega avtoag‘dargichlardan foydalanish ish samaradorligini oshirish bilan birga haydovchilarga qulay ish sharoitini yaratmoqda.

“NKMK” AJ Matbuot xizmati.