Navoiy kon-metallurgiya kombinati bo‘linmalarida konlardan qazib olinadigan oltin tarkibli maʼdanni qayta ishlash uchun gidrometallurgiya zavodlariga o‘z vaqtida va uzluksiz yetkazishda temir yo‘l transporti muhim o‘rin tutadi.

So‘nggi yillarda kombinat tomonidan yangi temir yo‘l liniyalarini qurish, mavjud infratuzilmani modernizatsiya qilish, lokomotiv va vagonlar parkini bosqichma-bosqich yangilash bo‘yicha olib borilgan ishlar yuk tashish hajmini oshirish hamda transport xarajatlarini qisqartirishga xizmat qilmoqda. Joriy yilda ham kon boshqarmalarida magistral va manyovr teplovozlar hamda yuk tashuvchi vagonlarni yangilash ishlari amalga oshirilmoqda.

- Bugungi kunda Shimoliy kon boshqarmasi Temir yo‘l transporti boshqarmasida 18 ta teplovoz va 514 ta vagondan foydalanilmoqda. “Qoqpatas va Dovg‘istov oltin konlarida maʼdan qazib olish (III navbati)” investitsion loyihasi doirasida 3 ta teplovoz va 60 ta vagon keltirilishi rejalashtirilgan. 2026-yilda boshqarmaga 1 ta yuqori texnik-iqtisodiy ko‘rsatkichlarga ega teplovoz va 6 ta o‘ziag‘daruvchi yarim ochiq vagon (dumpkar) olib kelinib ishga tushirildi, - deydi Shimoliy kon boshqarmasi Temir yo‘l transporti boshqarmasi boshlig‘i J.Ro‘ziqulov.

Qozog‘istonda ishlab chiqarilgan zamonaviy magistral teplovoz taʼmirlashning qulayligi, yoqilg‘i tejamkorlik ko‘rsatkichlari, uzoq muddat foydalanish, mashinistning hushyorligini nazorat qilish tizimining mavjudligi hamda mahalliy iqlim sharoitlariga mos keladigan texnik ko‘rsatkichlari temir yo‘l transporti bo‘yicha barcha qoida, meʼyor va yo‘riqnomalar talablariga to‘liq javob beradi. Vagonlar tarmoqlararo sanoat kooperatsiyasi doirasida “O‘zbekiston temir yo‘llari” AJ tarkibidagi Andijon mexanika zavodida tayyorlangan.

Korxona moddiy-texnika bazasini mustahkamlash, texnika parkini yangilash bo‘yicha olib borilayotgan bu kabi ishlar kombinatda qimmatbaho metall ishlab chiqarish hajmini oshirishga xizmat qiladi.

“NKMK” AJ Matbuot xizmati