So‘nggi yillarda Navoiy kon-metallurgiya kombinatida energetika sohasida elektr tarmoqlari va podstansiyalarni modernizatsiya qilish, elektr energiyasi taʼminoti sifatini oshirish, avariya holatlarining oldini olish hamda sohaga raqamli texnologiyalarni joriy etish bo‘yicha keng ko‘lamli ishlar olib borilmoqda.

Bu borada Janubiy kon boshqarmasi Tarmoqlar va podstansiyalar sexida muhim yangilanishlar amalga oshirildi. Korxonada elektr energiyasi taʼminotining xavfsizligini oshirish maqsadida, amaldagi releli himoya vositalari zamonaviy mikroprotsessorli qurilmalarga almashtirildi. Jumladan, Qo‘shrabot tumani Zarkent qo‘rg‘oni hududidagi qator podstansiyalarida yangi avlod mikroprotsessorli himoya qurilmalari o‘rnatildi. Mazkur qurilmalar elektr tarmoqlari va podstansiyalarda yuzaga kelishi mumkin bo‘lgan nosozliklarni tezkor aniqlash, avariyalarning oldini olish, elektr jihozlarini himoya qilish hamda isteʼmolchilarni uzluksiz elektr energiyasi bilan taʼminlashga xizmat qilmoqda.

- Yangi qurilmalarning muhim afzalliklaridan biri, bu – bir vaqtning o‘zida bir nechta vazifani bajara olishidir. Ular tarmoq parametrlarini doimiy monitoring qiladi, nosozliklar haqida aniq maʼlumotlarni qayd etadi va himoya tizimini avtomatik ravishda ishga tushiradi. Bu esa avariya oqibatlarini minimallashtirish imkonini beradi. Shuningdek, qurilmalar yuqori aniqlik va tezkorligi bilan ajralib turadi. Haroratning keskin o‘zgarishi va noqulay tashqi sharoitlarda ham barqaror ishlaydi. Natijada elektr taʼminotidagi uzilishlar qisqarib, ishlab chiqarish jarayonlarining uzluksizligi taʼminlandi, - deydi Tarmoqlar va podstansiyalar sexi boshlig‘i Muhammad Yunusov.

Shu davrga qadar amalga oshirilgan yangilanishlar natijasida elektr energiyasi taʼminoti tizimlarining ishonchliligi va xavfsizligi sezilarli darajada oshdi. Bu esa kombinatda zamonaviy energetika infratuzilmasini rivojlantirish hamda ishlab chiqarish barqarorligini taʼminlashga xizmat qilmoqda.

“NKMK” AJ Matbuot xizmati