Navoiy mashinasozlik zavodida “Navoiy kon-metallurgiya kombinati” AJ Konstruktorlar kengashining navbatdagi yig‘ilishi o‘tkazildi. Mazkur yig‘ilishda kengash aʼzolari, kombinat bo‘linmalaridan 50 nafardan ortiq muhandis-konstruktorlar ishtirok etishdi.

Dastlab muhandis-konstruktorlar bevosita zavod sexlarida bo‘lib, ishlab chiqarish jarayonlari bilan yaqindan tanishtirildi. Ular tomonidan asbob-uskunalarning bardoshligini oshirish va konstruksiyasini takomillashtirish, ehtiyot qismlarning xizmat muddatini uzaytirish, import butlovchi qismlarni mahalliylashtirish va xarajatlarni kamaytirish kabi masalalar muhokama qilindi.

Sexlardagi ishlab chiqarish jarayonlari bilan tanishgach, yig‘ilish davom etdi hamda Konstruktorlar kengashi faoliyati, vazifalar ijrosi va kelgusi rejalar muhokama etildi. Ushbu uchrashuvda besh nafar loyiha muallifi tashakkurnoma va esdalik sovg‘alari bilan taqdirlandi.

- Konstruktor uchun bu kabi uchrashuvlar muhim ahamiyatga ega. Mexanizmni chizmada ko‘rish, uning ishini kuzatish, mexaniklar, texnologlar bilan suhbatlashish, yuzaga kelayotgan muammolar bilan tanishish va ularni hal qilish yechimlarini joyida aniqlashdan farq qiladi. Ushbu uchrashuvda mutaxassislar zavod faoliyati bilan tanishdi, fikr-mulohaza, tajriba almashdi, muammolarni o‘rgandi va ularni hal etish yuzasidan chora-tadbirlar belgilandi, - deydi Konstruktorlar kengashi raisi Karimjon Abdullayev.

Konstruktorlik ishi oddiy vazifa emas, tinimsiz izlanish, intilish, iqtidor, bilim, tajriba va tafakkur talab etadi. Bu puxta ishlab chiqilgan murakkkab ilmiy-texnik loyiha, innovatsion g‘oya demakdir. Buni ushbu kasb egalari yaratadi. Kombinatda konstruktorlik maktabi shakllangan bo‘lib, kengash ularning ishini muvofiqlashtirgan holda, konstruktorlik loyihalarni tanlash va ommalashtirishda o‘ziga xos maslahat organi vazifasini bajarmoqda.

“NKMK” AJ Matbuot xizmati