Navoiy mashinasozlik zavodi – Navoiy kon-metallurgiya kombinatining mahalliylashtirilgan va import o‘rnini bosuvchi mahsulotlarni ishlab chiqaradigan yirik bo‘linmasi.

So‘nggi yillarda olib borilgan keng ko‘lamli ishlar natijasida zavod nafaqat respublikamizda, balki Markaziy Osiyodagi yirik og‘ir mashinasozlik korxonasiga aylandi. Bugungi kunda zavodda 11 ta sex, 5 ta uchastka, 3 ta laboratoriya hamda Taxiatosh metallkonstruksiyalar va nostandart jihozlar ishlab chiqarish zavodi va Termiz mexanika zavodi kabi bo‘linmalari mavjud bo‘lib, 3,4 ming nafar ishchi-xodim mehnat qilmoqda.

NMZ faoliyatida eʼtirofga molik yutuqlardan biri korxonada kombinat gidrometallurgiya zavodlarida ishlatiladigan yirik hajmdagi sharli tegirmonlar ishlab chiqarilishi yo‘lga qo‘yilganligi bo‘ldi. Masalan, hajmi 140 kubmetr bo‘lgan sharli tegirmonni chetdan xarid qilishning dunyo bozoridagi import narxi 6 mln. dollarga teng. Zavodda esa bu kabi tegirmon teng yarim narxida ishlab chiqarilmoqda. Xususan, 2024-yilda 2-gidrometallurgiya zavodiga tayyorlab berilgan tegirmondan 2,5 mln. dollardan ortiq valyuta iqtisod qilindi.

“NKMK” AJ Navoiy mashinasozlik zavodi direktori Jahongir Hayitov taʼkidlaganidek:

“Keyingi yillarda korxonamizda metall qo‘yishdan tortib, tayyor mahsulot ishlab chiqarishgacha bo‘lgan uzluksiz tizim yo‘lga qo‘yildi. Kombinat rahbariyati qo‘llab-quvvatlashi natijasida mahalliylashtirilgan mahsulotlar nomenklaturasi 15 ming turdan oshdi. Misol uchun, bu ko‘rsatkich 1991-yilda 4,1 ming turni tashkil etgan. Shuni alohida taʼkidlash joizki, hozirda ishlab chiqarayotgan raqobatbardosh va xalqaro standartlarga to‘la javob beradigan mahsulotlarimizning 98 foizi kombinat ehtiyojiga yo‘naltirilmoqda. 2024-yilda 112 ta loyiha bo‘yicha umumiy qiymati 835,8 mlrd. so‘mlik mahalliylashtirilgan va import o‘rnini bosuvchi mahsulotlar ishlab chiqarildi. 2025-yilda esa bu ko‘rsatkichni 1,1 trln. so‘mdan oshirish rejalashtirilgan.”

So‘nggi yillarda zavod ishlab chiqarish quvvatlarini oshirish maqsadida, Mexanika-yig‘uv sexi va Qo‘ymachilik sexida texnik va texnologik qayta jihozlashga qaratilgan investitsiyaviy loyihalar amalga oshirildi. Buning natijasida Mexanika-yig‘uv sexida og‘irligi 980 tonnagacha bo‘lgan tegirmonlar va og‘irligi 400 tonnagacha bo‘lgan yirik o‘lchamdagi jihozlarga ishlov berish imkoni yaratilib, Qo‘ymachilik sexida metall eritish quvvati 10 ming tonnaga oshirildi.

Navoiy kon-metallurgiya kombinatida keng ko‘lamli investitsiya dasturlarni amalga oshirish hisobiga kombinat bo‘linmalarining texnologik va kon uskunalari uchun ehtiyot qismlarga bo‘lgan talabining ortishi tufayli mahalliylashtirilgan mahsulotlar ishlab chiqarish hajmi yanada ortmoqda. Buning uchun 8 ta yuqori aniqlikda ishlaydigan zamonaviy stanok xarid qilish mo‘ljallangan. Bu, kelusida nafaqat ish ko‘lamini oshirish, balki yangi ish o‘rinlarii yaratishga xizmat qiladi.

“NKMK” AJ Matbuot xizmati