Navoiy kon-metallurgiya kombinatida zamonaviy muhandis kadrlarni tayyorlash, o‘qitish, qayta tayyorlash va malakasini oshirish ishlari tizimli yo‘lga qo‘yilgan. Kombinatning Navoiy, Zarafshon, Uchquduq shaharlari, Zarkent qo‘rg‘onidagi o‘quv markazlarida 2025-yilda jami 14 915 nafar ishchi belgilangan dasturlar bo‘yicha turli kasblarga o‘qitildi.

Bugungi kunda Zarafshon shahrida joylashgan o‘quv markazda 40 nafardan xodim faoliyat olib bormoqda. O‘tgan yili mazkur markazda qariyb 7 ming nafar ishchi qayta tayyorlandi, ikkinchi mutaxassislikka o‘qitildi va malakasini oshirdi. Markazda o‘quv jarayoniga 13 nafar malakali ishlab chiqarish ustalari hamda muhandislar jalb etilgan.

- O‘quv markazimiz Markaziy kon boshqarmasi bo‘linmalarida ishlaydigan ishchi-xodimlarga xizmat qo‘rsatadi. Markazda ekskavator, buldozer, burg‘ilash uskunasi, teplovoz mashinistlari, og‘ir yuk tashuvchi avtomobil haydovchisi, portlatuvchi, yer osti kon ishlari bo‘yicha lahmchi, tegirmon mashinisti, apparatchi, elektromontyor, chilangar va boshqa kasblar bo‘yicha 208 ta kasbga qayta tayyorlash hamda 144 ta malaka oshirish kurslari tashkil etilgan, - deydi o‘quv markazi direktori G‘ofurjon Yo‘ldoshev.

Shuningdek, rahbar-xodimlar malakasini turli oliygoh va respublika malaka oshirish markazlarida oshirish ham yo‘lga qo‘yilgan. O‘tgan yili Markaziy kon boshqarmasining bir guruh mutaxassislari Standartlashtirish, sertifikatlashtirish va texnik jihatdan tartibga solish ilmiy-tadqiqot instituti, Biznes va tadbirkorlik oliy maktabi va boshqa muassasalarda malaka oshirdi.

“NKMK” AJ Matbuot xizmati