Navoiy kon-metallurgiya kombinati korxonalarida ishchi-xodimlarning mehnat muhofazasi va xavfsizlik texnikasiga oid bilimlarini doimiy ravishda oshirish muhim ahamiyat kasb etadi. 28-aprel – Butunjahon mehnatni muhofaza qilish kuniga bag‘ishlab kombinat bo‘linmalarida aprelda “Mehnat muhofazasi oyligi” o‘tkazilmoqda.

Mazkur oylik doirasida Markaziy kon boshqarmasida haftaning shanba kunlari “NKMK” AJ Mehnat muhofazasi va xavfsizlik texnikasi Bosh boshqarmasi Markaziy boshqarmasi tomonidan “Sog‘lom psixologik-ijtimoiy ish muhitini taʼminlaylik” shiori ostida seminar-treninglar tashkil etilmoqda. Seminar-treninglar ishchi-xodimlarning mehnat muhofazasi bo‘yicha bilim saviyasini oshirish, ish joylarida qulay va xavfsiz mehnat sharoitlarini yaratish, inson hayoti va sog‘ligi ustuvorligini targ‘ib qilishga qaratilgan.

Shuningdek, tadbirlar ishtirokichilariga O‘zbekiston Respublikasi Vazirlar Mahkamasining 2025-yil 24-dekabrdagi “Mehnatni muhofaza qilish sohasiga oid ayrim nizomlarni tasdiqlash to‘g‘risida”gi qaroriga muvofiq, mamlakatimizda mehnatni muhofaza qilish to‘g‘risidagi qonunchilik hujjatlarining mazmun-mohiyati bo‘yicha maʼlumot berildi.

- Butunjahon mehnatni muhofaza qilish kuni 2003-yildan boshlab soha mutaxassislarining kasb bayrami sifatida nishonlanmoqda. Ushbu sana munosabati bilan dunyoning 100 dan ortiq davlatlarida ish joylarida sodir bo‘layotgan baxtsiz hodisalar va kasb kasalliklariga chalinishlarning oldini olish hamda mehnat muhofazasi masalalariga eʼtiborni yana-da kuchaytirishga qaratilgan tadbirlar tashkil etiladi. Bu kabi tadbirlar Markaziy kon boshqarmasi bo‘linmalarida ham muntazam o‘tkazilmoqda, - deydi “NKMK” AJ Mehnat muhofazasi va xavfsizlik texnikasi Bosh boshqarmasi Markaziy boshqarmasi boshlig‘i o‘rinbosari O.Beshimov.

“Mehnat muhofazasi oyligi” doirasida tashkil etilayotgangan tadbirlarning asosiy maqsadi ishchi-xodimlar o‘rtasida mehnat muhofazasi va xavfsizlik texnikasi qoidalariga qatʼiy amal qilish zarurligini targ‘ib etish, ishlab chiqarishda yuzaga kelishi mumkin bo‘lgan baxtsiz hodisalar oldini olishdir.

“NKMK” AJ Matbuot xizmati