Bugungi kunda sanoat korxonalarida mehnat xavfsizligini taʼminlash muhim vazifalardan biri hisoblanadi. Ayniqsa, yer osti konlarida olib boriladigan ishlar sharoitda ishchi-xodimlar hayoti va salomatligini muhofaza qilish, baxtsiz hodisalarning oldini olish hamda xavfsiz mehnat muhitini yaratish ishlab chiqarishning asosiy talablaridan biriga aylangan.

Navoiy kon-metallurgiya kombinatida mehnatni muhofaza qilish va xavfsizlik texnikasi qoidalariga qatʼiy rioya qilish masalasiga alohida eʼtibor qaratilmoqda. Bu borada korxona mutaxassislari tomonidan ishlab chiqarish jarayonlarini takomillashtirish va ishchi-xodimlarning xavfsizligini taʼminlashga qaratilgan ratsionalizatorlik takliflari amaliyotga joriy etilmoqda.

Bu kabi ratsionalizatorlik takliflaridan biri Janubiy kon boshqarmasi Ishlab chiqarish bo‘limi boshlig‘i Suhrob Rahimov hamda Konchilik bo‘limi yetakchi muhandisi Suhrob Rahmonov tomonidan “Zarmitan” va “G‘ujumsoy” yer osti konlarida maʼdan qazib olish jarayonida portlatish ishlarini xavfsiz amalga oshirish bo‘yicha birgalikda ishlab chiqildi. Mazkur taklifning asosiy maqsadi yer osti kon ishlarida mehnat qilayotgan ishchi-xodimlarning xavfsiz harakatlanishi taʼminlash, yuzaga kelishi mumkin bo‘lgan baxtsiz hodisalarning oldini olish hamda mehnat muhofazasi talablarining to‘liq bajarilishidan iborat.

- Yer osti konlarida har bir xavfsizlik chorasi inson taqdiri bilan bog‘liq. Shuning uchun ushbu taklifni ishlab chiqishda asosiy eʼtibor ishchi-xodimlarning hayoti va salomatligini muhofaza qilishga qaratildi. Maʼdan qazib olish jarayonidagi portlatish ishlarini olib borishda xavfsiz ish sharoitini yaratish orqali ehtimoliy baxtsiz hodisalarning oldini olish mumkin. Zero, xavfsizlik taʼminlangan joyda mehnat unumdorligi ham, ishlab chiqarish samaradorligi ham yuqori bo‘ladi, - deydi ratsionalizatorlik taklifining mualliflaridan biri S.Rahimov.

Janubiy kon boshqarmasi vakillarining ushbu ratsionalizatorlik taklifi bilan kombinat ishchi-xodimlari va yosh mutaxassislari o‘rtasida o‘tkazilgan anʼanaviy “Eng yaxshi ratsionalizatorlik taklifi” tanlovida ishtirok etib, tanlovning konchilik ishi yo‘nalishida faxrli 1-o‘ringa sazovor bo‘ldi.

“NKMK” AJ Matbuot xizmati