“Muruntov” konida tog‘ jinslarini qazish jarayonida olib borilayotgan portlatish ishlari natijasida yuzaga kelayotgan muammolarni ratsionalizatorlik takliflari yordamida yechishga alohida eʼtibor berilmoqda. Kon muhandis va mutaxassislari tomonidan portlatish ishlarini yanada takomillashtirish, samarali amalga oshirish bo‘yicha o‘nlab ratsionalizatorlik takliflari ishlab chiqilib, amaliyotga tatbiq etilmoqda.

Xususan, “Muruntov” koni bosh muhandisining portlatish ishlari bo‘yicha o‘rinbosari Oybek Saidov hamda muhandislar Oybek Sadritdinov, Sarvar Rayimov, Asqar Rajabovlarning hammualliflikdagi yana bir ratsionalizatorlik taklifi bo‘yicha portlatish ishlarida maʼdan sifatsizlanishi va yo‘qotilishini oldini olishga qaratilgan optimal usul joriy etish etildi.

Konda bajarilgan portlatish ishlari natijasida tog‘ jinslarining siljish masofasi uzayishi va meʼyoridan ortiq yuqoriga ko‘tarilishi kuzatilgan. Bu esa, o‘z navbatida, maʼdanning birlamchi joylashish tuzilishining o‘zgarishiga olib kelgan. Kon mutaxassislarining yuqoridagi amaliyotga tatbiq etilgan ratsionalizatorlik taklifi yordamida shu kabi muammolarga yechim topildi.

- Yillar davomida konda olib borilgan ommaviy portlatish ishlaridan so‘ng maydalangan tog‘ jinslarining sifati turlicha bo‘lganligi, ularni yuklash va tashishga salbiy taʼsir ko‘rsatgan. Bundan tashqari, ommaviy portlatish ishlaridan so‘ng tog‘ jinslari joylashgan yo‘l qisman yoki to‘liq portlatilgan tog‘ jinslari bilan yopilib qolishi natijasida ularni qazib olish unumdorligi pasaygan. Hammualliflikdagi navbatdagi ratsionalizatorlik taklifimiz amaliyotga joriy etilgandan so‘ng ommaviy portlatish ishlarida yuqorida qayd etilgan holatlar va maʼdan sifatsizlanishining oldi olindi. Bu esa, tog‘ jinslarini qazib olish hajmining oshishiga olib keldi, - deydi “Muruntov” koni bosh muhandisining portlatish ishlari bo‘yicha o‘rinbosari Oybek Saidov.

Taʼkidlash kerakki, agarda ushbu ratsionalizatorlik taklifi Navoiy kon-metallurgiya konbinatining boshqa konlarida ham qo‘llansa, qazib olinayotgan maʼdan sifatsizlanishi va yo‘qotilishini oldini olishga erishish mumkin.

“NKMK” AJ Matbuot xizmati