“Muruntov” konida olib borilayotgan konchilik ishlarining dastlabki va texnologik jihatdan muhim bosqichlaridan biri burg‘ilash jarayoni hisoblanadi. Konda tog‘ jinslarini qazib olish hajmlarining o‘sishi burg‘ilash ishlari ko‘lamini ham kengaytirishni talab etmoqda.

2025-yilda konda 3,7 mln. metr burg‘ilash ishlari bajarilgan bo‘lsa, joriy yil yakuniga qadar bu ko‘rsatkichni 7,8 mln. metrdan oshirish rejalashtirilgan. Burg‘ilash ishlarining bunday yuqori surʼatlarda oshishi “Muruntov” konining shimoliy, janubiy va sharqiy qismlarida kon ishlarini o‘z vaqtida bajarish hamda tog‘ jinslarini qazib olish hajmini yanada oshirish imkonini bermoqda.

Bugungi kunda kondagi mavjud burg‘ilash uskunalari bosqichma-bosqich zamonaviy, yuqori ish unumdorligiga ega “Epiroc” rusumli burg‘ilash uskunalariga yangilanmoqda. Ushbu uskuna bir sutkada o‘rtacha 500 metr hajmdagi burg‘ilash ishlarini bajarish quvvatiga ega.

- “Muruntov” koni chuqurlashib borishi natijasida pastki qatlamlardagi tog‘ jinslari qattiqlashib bormoqda. Bunday murakkab kon-geologik sharoitida burg‘ilash ishlarini bajarishda “Epiroc” rusumli burg‘ilash uskunalari yuqori samaradorlikni ko‘rsatib kelmoqda. Ushbu uskunalar to‘liq avtomatlashtirilgan va raqamli tizimlar bilan jihozlangan bo‘lib, kondagi mavjud dispetcherlik boshqaruv tizimiga to‘liq integratsiya qilingan. Bu esa ish jarayonini real vaqt rejimida masofadan turib nazorat qilish imkonini bermoqda. Mashinist kabinasi ichida isitish, sovutish, havoni tozalash va videokuzatuv tizimlari kabi qulayliklar yaratilgan. Konning 1-gidravlik uskunalarni taʼmirlash sexi mutaxassislari ushbu qurilmalarga mustaqil ravishda texnik xizmat ko‘rsatish imkoniga ega, - deydi “Muruntov” koni 2-burg‘ilash uchastkasi boshlig‘i O‘tkir Tursunov.

Ayni paytda konda 11 ta ana shunday zamonaviy burg‘ilash uskunalaridan foydalanilmoqda. “Muruntov konini o‘zlashtirish V navbatining II bosqichi” investitsion loyihasini amalga oshirish doirasida yana shu kabi texnikalar keltirilishi rejalashtirilgan.

“NKMK” AJ Matbuot xizmati