Navoiy kon-metallurgiya kombinati bo‘linmalarida foydalanilayotgan og‘ir yuk tashuvchi avtoag‘dargichlar va konchilik texnikalari tarkibini muntazam yangilab borishga alohida eʼtibor qaratilmoqda.

“Muruntov” konini o‘zlashtirish bo‘yicha amalga oshirilayotgan investitsion loyihalar doirasida kombinatning yirik avtokorxonasi – Markaziy kon boshqarmasi tarkibidagi Avtomobil transporti boshqarmasiga zamonaviy, yuqori texnik-iqtisodiy ko‘rsatkichlarga ega og‘ir yuk tashuvchi avtoag‘dargichlar keltirilmoqda.

Oldin xabar berganimizdek, mazkur avtokorxonaga keltirilgan, Yaponiyada ishlab chiqarilgan yuk ko‘tarish quvvati 221 tonna bo‘lgan “HITACHI EH4000AS-3” rusumli 2 ta kon avtoag‘dargichi mutaxassislar tomonidan yig‘ildi. Hozirgi vaqtda ushbu zamonaviy avtoag‘dargichlar “Muruntov” konida tog‘ jinslarini tashish jarayonida foydalanish uchun tayyor.

Korxonaga bu kabi rusumli avtoag‘dargichlar o‘tgan yili ilk bor keltirilgan bo‘lib, mashinaning kabinasida haydovchi uchun barcha sharoit va qulayliklar yaratilgan. Boshqaruv tizimi to‘liq avtomatlashtirilgan bo‘lib, bu haydovchiga transport vositasini qiyinchiliklarsiz boshqarish imkonini beradi. Harakatlanish vaqtida yon-atrofni 360 gradus radiusda kuzatish imkoniyatiga ega zamonaviy videokuzatuv kameralari bilan jihozlangan.

“NKMK” AJ Matbuot xizmati