11-12-noyabr kunlari “Navoiy kon-metallurgiya kombinati” AJ vakillari O‘zbekiston Respublikasi delegatsiyasi tarkibida Buyuk Britaniyaning O‘zbekistondagi elchixonasining biznes va savdo bo‘limi tomonidan London shahrida o‘tkazilgan “Jahon bozorlariga yo‘l: IPO va yevrobondlar” mavzsidagi anjumanda ishtirok etishdi. Ushbu tadbir ikki mamlakat o‘rtasidagi moliyaviy munosabatlarni rivojlantirish va tajriba almashishda muhim ahamiyat kasb etadi.

Mamlakatimizning 12 ta yetakchi davlat korxonalari va xususiy kompaniyalari, moliya tashkilotlari va banklari vakillari delegatsiya tarkibini tashkil etishdi. “NKMK” AJning mazkur anjumanda ishtirok etishidan ko‘zlangan maqsad ilg‘or xorijiy tajribalarga ega bo‘lish, moliya institutlari va investorlar bilan hamkorlik aloqalarini mustahkamlashdan iboratdir. Bu kompaniyaning xalqaro moliya ekotizimiga integratsiyalashuvi va xalqaro kapital bozorlari bilan o‘zaro hamkorlik orqali mamlakatimiz iqtisodiy tarqqiyotiga qo‘maklashishga xizmat qiladi.

Anjuman doirasida kompaniyalarni IPOga tayyorlash, yevrobondlar chiqarish va barqaror moliyalashtirish, strategik kommunikatsiyalar sohasida tajriba almashishga bag‘ishlangan seminarlar, taqdimotlar va panel muhokamalari bo‘lib o‘tdi. Shuningdek, anjuman davomida yetakchi ekspertlar, institutsional investorlar bilan uchrashuvlar o‘tkazilib, jahon bozorlarini shakllantirayotgan so‘nggi moliyaviy tendensiyalar va innovatsiyalar haqida maʼlumotlar olindi.

Shu bilan birga, mamlakatimiz delegatsiyasi anʼanaviy tadbir – London fond birjasida savdo kunining yopilishida ishtirok etdi. Ushbu tadbir O‘zbekiston kompaniyalarining moliya hamjamiyatlari bilan aloqalarini mustahkamlash istagini ifodalaydi hamda O‘zbekiston Respublikasi va Buyuk Britaniyaning jadal rivojlanayotgan moliya bozorlari o‘rtasida faol hamkorlik va tajriba almashish uchun asos yaratadi.

“NKMK” AJ Matbuot xizmati.