26-27-oktabr kunlari Toshkent shahrida Toshkent davlat texnika universiteti, Tarmoqlararo strategik innovatsiyalar va axborotlashtirish markazi, “Navoiy kon-metallurgiya kombinati” AJ hamkorligida tashkil etilgan “Innovatsiya-2026” XXX xalqaro ilmiy-amaliy anjuman o‘tkazilmoqda.

Mazkur xalqaro anjumanda ta’lim va ilm-fan sohasini raqamlashtirish, konchilik ishi va metallurgiya, geologiya, avtomatlashtirilgan boshqaruv tizimlari, raqamlashtirish, iqtisodiyot tarmoqlarida sun’iy intellekt va innovatsion jarayonlar, tabiiy va mineral resurslardan oqilona foydalanish muammolarini hal qilish, ekologiya, sanoat xavfsizligi va mehnatni muhofaza qilish kabi masalalar muhokama etilmoqda.

Ushbu tadbirning yalpi yig‘ilishida “NKMK” AJ Boshqaruvi raisi – Bosh direktori, texnika fanlari doktori, professor Quvondiq Sanaqulov ishtirok etib, “Avtomatlashtirish va raqamlashtirish – “NKMK” AJ negizida innovatsion konchilik va metallurgiya klasterini jadal rivojlantirishning asosiy omillaridir” mavzusida ma’ruza qildi.

Anjumanda professor Quvondiq Sanaqulov va professor Amanulla Qodirov hammuallifligida chop etilgan “Raqamlashtirish tog‘-kon sanoatining iqtisodiy samaradorligi va raqobatbardoshligini oshirish omili” monografiyasining taqdimoti ham bo‘lib o‘tdi. Oltita bobdan iborat monografiyada innovatsion va raqamli rivojlanish asoslari, texnologiyalar, xalqaro tajriba va NKMK tajribasi aks ettirilgan. Shu bilan birga, konchilik uskunalariga texnik xizmat ko‘rsatish, ularning foydalanish samaradorligini oshirishga alohida e’tibor qaratilgan.

Shuningdek, anjuman yo‘nalishlari bo‘yicha tashkil etilgan yig‘ilishlarda Navoiy kon-metallurgiya kombinati mutaxassislari qatnashmoqda.

“NKMK” AJ Matbuot xizmati