Aziz yoshlar!

Sizlarni bugungi bayram – Yoshlar kuni bilan chin qalbimdan samimiy tabriklayman.

Yangi O‘zbekistonda mamlakatimiz yoshlari baxti va kamoli uchun barcha sharoitlar yaratib berilmoqda. Yoshlarimiz ilm-fan, ishlab chiqarish, axborot texnologiyalari, tadbirkorlik, sport kabi sohalarda katta muvaffaqiyatlarga erishib kelishmoqda.

Bugun Sizlar ishlab chiqarishning barcha jabhalarida mehnat qilib, amalda har qanday masʼuliyatli vazifani zimmangizga olishga qodir ekanliklaringiz, g‘ayrat va shijoatingizni namoyon etib kelayotganligingiz hamda har biringiz hayotda o‘z o‘riningizni topayotganliklaringiz cheksiz g‘urur va iftixor bag‘ishlaydi.

Navoiy kon-metallurgiya kombinatida yoshlar ko‘pming kishilik jamoaning qariyb to‘rtdan bir qismi yoki 11,5 ming nafarini tashkil etadi. Ularning 4,2 ming nafari oliy maʼlumotli yoshlar bo‘lib, 350 nafar yosh rahbarlarimiz gidrometallurgiya zavodlari, kon va shaxtalar, sex va uchastkalar, laboratoriyalar, zamonaviy texnika va texnologiyalarni mahorat bilan boshqarib, o‘zlarining yetakchilik salohiyatlari, ilg‘or g‘oya va takliflari bilan ishlab chiqarish surʼatini oshirishga munosib hissa qo‘shib kelayotgani ulkan korxonamiz kelajagi ishonchli qo‘llarda ekanligidan dalolatdir.

Yoshlar bayrami arafasida muhtaram Prezidentimizning qaroriga ko‘ra, Navoiy mashinasozlik zavodi muhandis-texnologi Hazrat Salimjonov hamda Navoiy davlat konchilik va texnologiyalar universiteti katta o‘qituvchisi Hayot Istamovlar “Mard o‘g‘lon” davlat mukofoti bilan taqdirlangani hammamiz uchun quvonchli xushxabar, yuksak eʼtirof bo‘ldi. Fursatdan foydalanib, ularni davlatimizning yuksak mukofotiga sazovor bo‘lganliklari bilan chin dildan tabriklaymiz.

Kombinatda 2026-yilda yoshlarga oid davlat siyosatini amalga oshirish chora-tadbirlar dasturi, yoshlar oyligi doirasida muntazam o‘tkazib kelinayotgan turli loyihalar, tanlovlar, sport musobaqalari, rahbar va yoshlar uchrashuvlari, maʼnaviy-maʼrifiy tadbirlar, sayohat va ekskursiyalar ular qobiliyatlarini, orzu-maqsadlarini yuzaga chiqarishga xizmat qilmoqda.

Hech qachon unutmang, Vatanga xizmat qilish, bu – burch, ishonchni oqlash, bu – ulkan masʼuliyat, konchilik va metallurgiya sohasida ishlash sharaf, shunday jannatmakon yurtda yashayotganimiz esa hammamiz uchun katta faxrdir. Ilm va kasb egallab, Yangi O‘zbekiston taraqqiyoti, kombinatimiz ravnaqiga sadoqat bilan xizmat qilishdan aslo to‘xtamang!

Qadrli yoshlar!

Yana bir bor Yoshlar kuni bilan samimiy qutlar ekanman, barchangizga mustahkam sog‘lik-salomatlik, oilaviy baxt-saodat, kelgusi faoliyatlaringizda yangidan-yangi zafarlar tilayman.

Quvondiq SANAQULOV,

“Navoiy kon-metallurgiya kombinati” AJ

Boshqaruvi raisi – Bosh direktori.