Bugungi kunda Navoiy mashinasozlik zavodida mahalliylashtirish dasturi doirasida konchilik va metallurgiya korxonalari uchun zarur ehtiyot qismlar, uskuna va jihozlar ishlab chiqarilmoqda. Zavodda ishlab chiqarilayotgan mahsulotlarning sifatini yaxshilash maqsadida korxona sexlarida mavjud asbob-uskunalar, metallga ishlov beruvchi dastgohlarni modernizatsiya qilishga alohida eʼtibor qaratilmoqda.

Joriy yilda zavodning stanoksozlik sexiga Germaniyaning mashinasozlik sohasidagi yetakchi “Kapp Niles” kompaniyasida ishlab chiqarilgan “ZP-24” rusumli dastgoh keltirildi. Ushbu zamonaviy dastgoh diametr o‘lchovi 2,4 ming millimetrgacha bo‘lgan tishli g‘ildiraklarni silliqlash, og‘irligi 20 tonnagacha bo‘lgan yirik detallarga yuqori darajada ishlov berishga mo‘ljallangan. G‘ildiraklarni silliqlash jarayoni orqali termik ishlovdan keyin paydo bo‘ladigan mayda nuqsonlar va deformatsiyalar bartaraf etilmoqda.

Ushbu dastgoh zamonaviy avtomatik nazorat vositalari va dasturiy taʼminot bilan jihozlangan bo‘lib, bu har bir detalning belgilangan talablarga mosligini yuqori aniqlik bilan tekshirish imkonini bermoqda. Loyihaning amalga oshirilishi natijasida korxonada 3 ta yangi ish o‘rni yaratildi.

Endilikda Navoiy mashinasozlik zavodida konveyer reduktorlari, kon, shaxta, karyer mashinalarining tishli g‘ildiraklari va vallariga yana-da aniqlik bilan mexanik ishlov berish imkoni mavjud. Natijada mahsulotlarning ishlash muddati uzayib, ulardan foydalanish jarayonida shovqin darajasi pasayishiga erishilyapti.

“NKMK” AJ Matbuot xizmati