Bugungi kunda Navoiy kon-metallurgiya kombinatida energiya samaradorligini oshirish uchun qayta tiklanuvchi energiya manbalaridan foydalanish bo‘yicha keng ko‘lamli ishlar amalga oshirilmoqda. Bu esa, o‘z navbatida, kombinat faoliyatining ekologik va iqtisodiy barqarorligini taʼminlashda muhim ahamiyat kasb etadi.

So‘nggi yillarda kombinat korxonalarida quyosh energiyasidan foydalanishni kengaytirish maqsadida, ishlab chiqarish maydonlarida quyosh fotoelektr stansiyalarini qurish bo‘yicha qator loyihalar amalga oshirildi. Misol uchun, 2024-yilda kombinatda ishga tushirilgan quyosh fotoelektr stansiyalarining umumiy quvvati 1 450 kW ni tashkil etgan bo‘lsa, 2026-yilga kelib amaldagi quyosh fotoelektr stansiyalarning umumiy quvvati qariyb 6 barobar oshirilib, 10 050 kW ga yetkazildi. Natijada o‘tgan yilda ushbu fotoelektr stansiyalar yordamida 11,5 mln kW.h. elektr energiyasi ishlab chiqarildi.

- Bugungi kunda kombinatning barcha maʼmuriy binolari fotoelektr stansiyalardan olinadigan elektr energiya bilan to‘liq taʼminlangan. 2025-yilda Nurota tumanidagi “Pistali” koni maydonida 2 300 kW quvvatli, 4-gidrometallurgiya zavodi hududida 900 kW quvvatli, Zarafshon qurilish boshqarmasida 500 kW quvvatli quyosh fotoelektr stansiyalari ishga tushirildi. Hozirgi vaqtda kombinat elektr energiyasi isteʼmolining 20 foizdan ortig‘i “yashil energiya”, yaʼni bilvosita Tomdi tumanida joylashgan 500 MW quvvatga ega shamol elektr stansiyasida ishlab chiqarilayotgan elektr energiyasi hisobidan qoplanmoqda, - deydi “NKMK” AJ Bosh energetigi o‘rinbosari Ikromjon Shukurlayev.

Shuningdek, kombinat korxonalarida jami 5 000 donadan ziyod quyosh suv isitish qurilmalari – geleokollektorlar o‘rnatilgan bo‘lib, yoz mavsumida ular yordamida sutkasiga qariyb 724 ming litr hajmda issiq suv ishlab chiqarilmoqda. Natijada yoz mavsumi davomida kombinatning issiq suvga bo‘lgan ehtiyoji to‘liq quyosh energiyasi hisobidan taʼminlanmoqda. Bu esa yiliga 1,7 mln. kubometr tabiiy gazni tejash, 12,3 mln. kW.h. elektr energiyasini iqtisod qilishga xizmat qilmoqda.

“Yashil energetika” yo‘nalishida Navoiy kon-metallurgiya kombinatida tasdiqlangan “Yo‘l xaritasi”ga asosan 2026-2030-yillar davomida umumiy quvvati 26,1 MW bo‘lgan fotoelektr stansiyalari foydalanishga topshirilishi rejalashtirilgan.

“NKMK” AJ Matbuot xizmati