Navoiy shahridagi “Farhod” madaniyat saroyida joriy yilning 17-20-aprel kunlari “Navoiy kon-metallurgiya kombinati” AJ, “NKMK jamg‘armasi” DM va NKMK xodimlari kasaba uyushmasi Kengashi tashabbusi bilan NKMK madaniyat muassasalari ijodiy jamoalari o‘rtasida “Qizilqum sanʼat g‘unchalari - 2025” XVII bolalar festival-tanlovi o‘tkazildi.

Anʼanaviy tarzda o‘tkazib kelinayotgan festivalda NKMK madaniyat muassasalaridan 600 nafardan ortiq sanʼatga shaydo yoshlar ishtirok etdi. Tanlov davomida 5 yoshdan 17 yoshgacha bo‘lgan ishtirokchilar milliy, zamonaviy, xalq raqslari, estrada raqs sanʼati, vokal, orkestr va zarbli cholg‘u asboblari, yakkaxon xonandalik hamda xoreografiya yo‘nalishlari bo‘yicha o‘zaro bellashdilar.

Ijodiy jamoalarning chiqishlarini O‘zbekistonda xizmat ko‘rsatgan madaniyat xodimi Alisher Madraximov boshchiligidagi hakamlar hayʼati baholab bordi. Ular yosh sanʼatkorlarning nafaqat ijro mahoratiga, balki milliy qadriyat va anʼanalarni o‘zida aks ettirgan qo‘shiqlari, bir-birini takrorlamas liboslari va sahna madaniyatlariga ham eʼtibor qaratdilar.

- Ushbu bolalar ko‘rik-tanlovi ko‘p yillardan buyon muntazam o‘tkazib kelinmoqda. O‘tgan davr mobaynida unda bir qator isteʼdodlar kashf etib kelinmoqda. Eng asosiysi, kombinat madaniyat muassasalari o‘rtasida bo‘lib o‘tadigan mazkur tanlov turli janrlarda yoshlarning o‘z isteʼdodlarini namoyish etishi uchun keng imkoniyat yaratib kelmoqda. Ijodkor jamoalarning olib borayotgan ishlari aynan mana shu tanlovda o‘z bahosiga ega bo‘layapti. Bu gal ham tanlovga hakamlik qilish uchun respublikamizdan taniqli sanʼat arboblari va madaniyat xodimlari taklif etildi. Bu yosh isteʼdod sohiblariga ko‘tarinki ruh berishi tabiiy. Bu kabi tanlovlarning o‘tkazilishi yosh avlodni har tomonlama voyaga yetkazishda, ular o‘rtasidagi isteʼdodlarni aniqlash va ularning madaniy, musiqiy estetik didini shakllantirishda muhim ahamiyatga ega, - deydi NKMK xodimlari kasaba uyushmasi Kengashi raisi o‘rinbosari M.Nurimova.

Festivalning yakuniy natijalariga ko‘ra, xoreografiya yo‘nalishi bo‘yicha “Shirin” ansambli milliy raqs nominatsiyasida, “Schastlivoye detstvo” ansambli esa xalq raqslari nominatsiyasida Gran-Prini qo‘lga kiritishdi. Estrada va zamonaviy raqslar nominatsiyasi bo‘yicha Gran-Priga “Farhod” madaniyat saroyining “Sonata” va Uchquduq madaniyat saroyining “Ekspressiya" ansambllari sazovor bo‘lishdi. Zarbli cholg‘u asboblari yo‘nalishi bo‘yicha birinchi o‘rin “Oltin vodiy” madaniyat uyining “Allegro” ansambliga nasib etdi. Estrada solo vokal ijrochiligi yo‘nalishi bo‘yicha 12 yoshgacha va undan yuqori ijrochilar kategoriyalarida Zafarobod qo‘rg‘onidagi “Yoshlik” madaniyat va sport markazidan Aysu O‘rinbayeva hamda Uchquduq shahridagi “Uchquduq” madaniyat saroyidan Tolebi Nurlibayevlarga Gran-Pri topshirildi. G‘olib jamoalar tashkilotchilar tomonidan diplom va qimmatbaho sovg‘alar bilan taqdirlandi.

Shuningdek, “Qizilqum sanʼat g‘unchalari - 2025” XVII bolalar festival-tanlovi doirasida hamda O‘zbekiston Respublikasi madaniyat va sanʼat xodimlari kuni munosabati bilan NKMK madaniyat muassasalarida faoliyat olib borayotgan bir guruh soha xodimlari “Konchilik shuhrati” ko‘krak nishoni va “NKMK faxriysi” unvoni bilan taqdirlandi.

Taqdirlash marosimida “NKMK” AJ Boshqaruvi raisi – Bosh direktori Q.Sanaqulov, NKMK xodimlari kasaba uyushmasi Kengashi raisi I.Rahmatov, “NKMK jamg‘armasi“ DM bosh direktori D.Ochilovlar ishtirok etishdi.

Tadbir yakunida badiiy jamoalar va poytaxtdan tashrif buyurgan taniqli sanʼatkorlar ishtirokidagi gala konsert namoyish etildi.

“NKMK” AJ Matbuot markazi