IJTIMOIY MASʼULIYAT

O‘zbekiston Respublikasi Prezidentining tegishli qaroriga asosan yurtimizda muqaddas Ramazon oyining milliy an’ana va qadriyatlarga mos tarzda o‘tishini ta’minlash bo‘yicha keng ko‘lamli tadbirlar amalga oshirilmoqda.

“Ramazon – mehr-muruvvat, ahillik va shukronalik oyi” degan ezgu g‘oya ostida o‘tkazilayotgan tadbirlar yurtdoshlarimiz orasida hamjihatlik, mehr-oqibat va saxovat tuyg‘ularini yanada mustahkamlashga xizmat qilmoqda.

Shu munosabat bilan Tog‘-kon sanoati va geologiya vazirligi, tizimdagi korxona va tashkilotlar, shu jumladan, Navoiy kon-metallurgiya kombinati tomonidan ham Ramazon oyining ezgu qadriyatlarini keng targ‘ib etishga qaratilgan xayriya tadbirlari hamda iftorlik dasturxonlari tashkil etildi.

Xususan, Zarafshon shahri, Tomdi, Uchquduq, Xatirchi tumanlarida iftorlik dasturxonlari yozilib, iftorliklarga nuroniylar, mehnat faxriylari, ziyolilar hamda ijtimoiy ko‘makka muhtoj aholi vakillari taklif etildi. Tadbirlarda “Navoiy kon-metallurgiya kombinati” AJ rahbariyati ishtirok etdi. Iftorliklarda yurtimiz tinchligi, xalqimiz farovonligi va ezgu niyatlar ijobati uchun duolar qilindi.

Bunday xayrli tashabbuslar Ramazon oyining insonparvarlik, hamjihatlik va saxovat kabi yuksak qadriyatlarini yana bir bor namoyon etib, jamiyatimizda mehr-muruvvat va bag‘rikenglik muhitini mustahkamlashga xizmat qilmoqda.

“NKMK” AJ Matbuot xizmati