Navoiy kon-metallurgiya kombinatida izlanuvchan, ratsionalizator yoshlar soni yildan-yilga ortib bormoqda. Ular geologiya, konchilik, metallurgiya, oltin ajratib olish texnologiyasi, mexanika, energetika, transport, axborot-kommunikatsiya texnologiyalari, ishlab chiqarishni avtomatlashtirish va boshqa yo‘nalishlarda yangilik yaratib, iqtidorlarini namoyon etishmoqda. Ularning ratsionalizatorlik takliflari ishlab chiqarishga tatbiq etilayapti va yaxshi samara berayapti.

Kombinat ilmiy-tadqiqot va tajriba-konstruktorlik ishlariga investitsiyalar hajmi, shuningdek, faoliyatga joriy etilgan istiqbolli ishlanmalar va ratsionalizatorlik takliflari soni bo‘yicha respublikada yetakchi hisoblanadi. Korxona bo‘linmalarida ixtirochilik faoliyatini qo‘llab-quvvatlash va rag‘batlantirish tizimi, yoshlarning texnik ijodiyotini rivojlantirish dasturlari ishlab chiqilgan bo‘lib, har yili “Eng yaxshi ratsionalizatorlik taklifi” tanlovi 10 ta yo‘nalish bo‘yicha o‘tkazib kelinmoqda.

2018-2024-yillarda kombinat mutaxassislarining 1 253 ta ratsionalizatorlik taklifi yuzasidan ijobiy qaror qabul qilinib, ishlab chiqarishga joriy etilgan. Amaliyotga tadbiq etilgan ratsionalizatorlik takliflaridan 556,2 mlrd. so‘m iqtisodiy samara olindi. Birgina 2024-yildagi 202 ta ratsionalizatorlik taklifidan 101 mlrd. so‘mlik iqtisodiy samara olish rejalashtirilgan. Misol uchun, Markaziy kon boshqarmasi Temir yo‘l transporti boshqarmasida keyingi besh yilda 50 dan ortiq ratsionalizatorlik taklifi ishlab chiqarish jarayoniga joriy qilindi.

- O‘z sohamning yetuk mutaxassisi bo‘lish maqsadida, kombinat yosh ishchi-xodimlari o‘rtasida o‘tkaziladigan anʼanaviy “Eng yaxshi ratsionalizatorlik taklifi” tanlovida 2019-yildan buyon qatnashib kelyapman. 2024-yilda ushbu tanlovda avtomatik tozalovchi moy filtrlarining ishini uzluksiz nazorat qilishga qaratilgan ratsionalizatorlik taklifim bilan qatnashdim va munosib rag‘batlantirildim, - deydi MKB Temir yo‘l transporti boshqarmasi Lokomotiv xizmati uchastkasi boshlig‘i Rustam Ramazonov.

Kombinat korxonalarida ratsionalizatorlik faoliyati bo‘yicha olib borilayotgan ishlar iqtisodiy samara berishdan tashqari, ish unumdorligini oshirish, vaqtni tejash hamda ishchi-xodimlarga qulayliklar yaratishga xizmat qilmoqda.

“NKMK” AJ Matbuot xizmati