“Navoiy kon-metallurgiya kombinati” AJ Markaziy kon boshqarmasida Masʼuliyatli oltin qazib olish tamoyillari va Sianidlar bilan ishlash bo‘yicha xalqaro kodeksni joriy etishdagi yutuqlarni baholash bo‘yicha yillik audit doirasida ushbu xalqaro kodeksni tatbiq etish va unga rioya qilish masalalariga bag‘ishlangan seminar o‘tkazildi.

Tadbirdan ko‘zlangan maqsad – xodimlarning sianidlar bilan xavfsiz ishlashning xalqaro standartlari bo‘yicha bilim darajasini oshirish, mehnatni muhofaza qilish madaniyatini mustahkamlash va ishlab chiqarishda ekologik xavfsizlikni taʼminlashdan iborat.

Seminarda Sianidlarni boshqarish bo‘yicha xalqaro institutining akkreditatsiyadan o‘tgan auditori, tog‘-kon sanoati korxonalarida mehnatni muhofaza qilish va xavfsizlik texnikasi sohasida 40 yildan ortiq tajribaga ega bo‘lgan ekspert Kelso Sandt Pessoa (Celso Sandt Pessoa) ishtirok etdi.

Seminarda mazkur xalqaro kodeksning asosiy qoidalari, tog‘-kon sanoatida sianidlardan xavfsiz foydalanishga zamonaviy yondashuvlar, ishchi-xodimlar salomatligi va atrof-muhit uchun xavflarning oldini olish bo‘yicha jahon amaliyotidan misollar ko‘rib chiqildi.

Taʼkidlash joizki, bunday tadbirlarning o‘tkazilishi korporativ masʼuliyatni kuchaytirish va xodimlarning kasbiy malakasini oshirishga xizmat qiladi. Tadbir yakunida uning ishtirokchilari amaliy tavsiyalar va dolzarb savollarga javoblar olishdi.

“NKMK” AJ Matbuot xizmati