Poytaxtimizda 10-12-iyun kunlari IV Toshkent xalqaro investitsiya forumi o‘tkazilib, uning doirasida turli mavzulardagi sessiyalar hamda O‘zbekistonning birinchi sanoat va investitsiya salohiyati ko‘rgazmasi tashkil etildi.

Nufuzli ko‘rgazmada respublikamizdagi yuzdan ortiq yirik sanoat korxonalari xalqaro investorlarga o‘z imkoniyatlarini namoyish etishdi. Xususan, tadbirda “Navoiy kon-metallurgiya kombinati” AJ vakillari ham faol ishtirok etishdi. Kombinat ekspozitsiyasiga Bolgariya Respublikasi Prezidenti Rumen Radev, Slovakiya Bosh vaziri Robert Fitso, Qirg‘iziston Hukumati raisi Adilbek Kasimaliyevlar tashrif buyurishdi.

Shuningdek, ko‘rgazmada NKMK vakillari – bosh direktorning transformatsiya masalalari bo‘yicha birinchi o‘rinbosari Y.Antonov, bosh direktorning iqtisod va moliya bo‘yicha o‘rinbosari J.Xasanov, bosh direktorning kapital qurilish bo‘yicha o‘rinbosari M.Alkarov, Xaridlarni tashkil etish va metodologiyasini takomillashtirish bosh boshqarmasi boshlig‘i M.Amonov hamda boshqa mutaxassislar xorijiy investorlar bilan ikki tomonlama uchrashuvlar o‘tkazib, ularni korxona faoliyati bilan yaqindan tanishtirishdi.

Shu bilan birga, IV Toshkent xalqaro investitsiya forumi doirasida bosh direktorning transformatsiya masalalari bo‘yicha birinchi o‘rinbosari Y.Antonov “O‘zbekiston tog‘-kon sanoati: investorlar uchun yangi imkoniyatlar” mavzusidagi panel sessiyasida ishtirok etdi. Y.Antonov taʼkidlaganidek, NKMKning barqarorligi, ishlab chiqarishning yuqori samaradorligi kompaniyani dunyodagi eng raqobatbardosh va barqaror oltin ishlab chiqaruvchilardan biri bo‘lish imkonini beradi. 2024-yilning moliyaviy natijalari buning tasdig‘idir: sof tushum 7,4 mlrd. AQSh dollarini tashkil etdi va EBITDA ko‘rsatkichi 60 foizdan oshdi.

Biroq raqamlar ortida barqarorlik ustuvorligi turipti. Suv isteʼmolini kamaytirish, chiqindilarni qisqartirish, qayta tiklanuvchi energiya manbalarini keng joriy etish va hududlarni rivojlantirishga 200 mln. AQSh dollaridan ortiq investitsiyalar – bu NKMKning yer qaʼridan masʼuliyatli foydalanish yo‘lidagi amaliy qadamlaridir. Shuningdek, kompaniya O‘zbekiston tog‘-kon sanoatida birinchi bo‘lib ESG-reytingini oldi, bu esa uning faoliyati jahon ESG-standartlariga muvofiqligini tasdiqlaydi.

IV Toshkent xalqaro investitsiya forumida NKMK O‘zbekiston iqtisodiy o‘sishining muhim qismi va tog‘-kon sanoatida uzoq muddatli va masʼuliyatli hamkorlikdan manfaatdor investorlar uchun ishonchli hamkor ekanligini yana bir bor tasdiqladi.

“NKMK” AJ Matbuot xizmati.