Navoiy kon-metallurgiya kombinati ishchi-xodimlari, ularning oila aʼzolari hamda hudud aholisiga yuqori malakali va sifatli tibbiy yordam ko‘rsatish ko‘lamini yanada kengaytirish maqsadida, Navoiy shahridagi Tibbiy-sanitariya bo‘limida zamonaviy angiografiya bo‘limi ishga tushirildi.

Mazkur bo‘limni zamonaviy angiografiya apparati, reanimatsiya va defibrillyatorlar kabi zaruriy tibbiy uskunalar bilan jihozlash kombinat homiyligida amalga oshirildi. Ushbu yuqori texnologik uskuna yurak-qon tomir kasalliklarini erta aniqlash, o‘tkir holatlarda shoshilinch va yuqori texnologik jarrohlik amaliyotini o‘z vaqtida hamda yuqori saviyada amalga oshirish imkonini beradi. Bu bemorlarni boshqa hududlarga bormasdan o‘z viloyatida tibbiy sifatli yordam olishini taʼminlaydi.

Angiografiya bo‘limi ishga tushirilishi munosabati bilan o‘tkazilgan tadbirda NKMK xodimlari kasaba uyushmasi Kengashi raisi I.Rahmatov so‘zga chiqib, bugungi kunda tibbiyot tizimida, shu jumladan, ishchi-xodimlar salomatligini mustahkamlash borasida amalga oshirilayotgan ishlar to‘g‘risida gapirdi.

Ushbu zamonaviy uskunadan samarali foydalanish va ilg‘or amaliyotlarni yo‘lga qo‘yish uchun Behro‘z Bahronov, Sherzod Ahmedov va Ulug‘bek Ramazonov kabi yuqori malakali, tajribali intervension kardiologlar jalb etildi. Yuqori salohiyatga ega shifokorlar nufuzli A.N. Bakulev nomidagi yurak-qon tomir jarrohligi ilmiy institutini tamomlab, katta amaliy tajriba to‘plagan mutaxassislar hisoblanadi.

- Yurak-qon tomir kasalliklari jahon miqyosida o‘lim ko‘rsatkichlarining asosiy sabablaridan biri ekani hisobga olinsa, mazkur bo‘limning ishga tushirilishi yuzlab insonlar hayotini saqlab qolishda muhim ahamiyatga ega. Xususan, bu yerda yurak koronar qon tomirlari muammolariga duch kelgan va shoshilinch tibbiy yordamga muhtoj bemorlarga yuqori malakali xizmat ko‘rsatiladi. Ayniqsa, yangi tibbiy jihoz yordamida koronar qon tomirlari, uyqu va son arteriyalarida koronarografiya tekshiruvlarini o‘tkazish, shoshilinch holatdagi bemorlarning yurak-qon tomir tizimiga yuqori texnologik stend qo‘yish, shuningdek, bachadon miomasini embolizatsiya qilish kabi noyob amaliyotlarni bajarish imkoniyati yaratildi, - deydi Tibbiy-sanitariya bo‘limi boshlig‘i Alisher To‘qsanov.

Tadbir yakunida yig‘ilganlar zamonaviy talablar asosida jihozlangan va barcha qulayliklarga ega angiografiya bo‘limida bemorlar uchun yaratilgan sharoitlar bilan yaqindan tanishtirildi.

“NKMK” AJ Matbuot xizmati