Navoiy kon-metallurgiya kombinatida mahsulot ishlab chiqarish tannarxini pasaytirish muhim vazifalardan biri hisoblanadi. Bu maqsadda konlardan qazib olinayotgan tog‘ jinslarini doimiy va vaqtinchalik saqlash joylariga yetkazishda konveyer liniyalaridan keng foydalanilmoqda.

Kombinatda tog‘ jinslarini konveyerlar orqali tashish eng qulay, samarali va tejamkor ekanligi amalda isbotlangan. Bugungi kunda kombinat kon-shaxtalari va gidrometallurgiya zavodlarida umumiy uzunligi 54,3 ming metr bo‘lgan konveyer liniyalari ishlatilmoqda. Bu kabi liniyalar yordamida bir oyda o‘rtacha 3,1 mln. kubometrdan ortiq tog‘ jinslari tashilmoqda. Konveyerlardan foydalanish tog‘ jinslarini avtoag‘dargichlarda tashishga sarflanayotgan vaqt, yo‘l masofasi va yoqilg‘i-moylash materiallari xarajatlarini qisqartirishda muhim ahamiyat kasb etadi.

Keyingi yillarda kombinatda ish unumdorligi yuqori bo‘lgan bunday konveyer liniyalarini qurish va kengaytirishga alohida eʼtibor qaratildi. Birgina, 2025-yilda 6 356 metr, jumladan, “Muruntov” konida 4 900 metr, “Dovg‘iztov” konida 1 456 metr liniyalar barpo etilib, davriy oqim texnologiya majmualari ishga tushirildi. Joriy yilda ham “Muruntov” va “Auminzo-Amantay” konlarida jami 12,8 ming metrdan ortiq konveyer liniyalarini qurish ishlari olib borilmoqda.

Eʼtiborli jihati, liniyalarni qurish ishlari to‘liq kombinat jamoasi tomonidan amalga oshirilmoqda. Mahalliylashtirish dasturi doirasida kerakli asbob-uskunalar Navoiy mashinasozlik zavodi va Zarafshon taʼmirlash-mexanika zavodida tayyorlanib, qurilish-montaj ishlari Zarafshon qurilish boshqarmasi tomonidan bajarilmoqda. Bu kabi tejamkorlik, o‘z navbatida, ishlab chiqarish ko‘rsatkichlarini oshirish, mahsulot ishlab chiqarish tannarxini pasaytirishga xizmat qilmoqda.

“NKMK” AJ Matbuot xizmati