Navoiy kon-metallurgiya kombinatida qayta tiklanuvchi energiya manbalaridan olinadigan elektr energiyasi hajmi yildan-yilga ortib bormoqda. “Yashil energetika” korxonalarda amaldagi energiya manbalariga qo‘shimcha quvvat ishlab chiqarishni taʼminlamoqda.

Xususan, O‘zbekiston Respublikasi Prezidentining 2023-yil 2-maydagi qarori ijrosini taʼminlash maqsadida investitsiya loyihasi asosida Tomdi tumanidagi 623 gektar maydonda “NKMK” AJ ishlab chiqarish obyektlari ehtiyojlari uchun umumiy quvvati 500 MW bo‘lgan quyosh fotoelektr stansiyasi qurilishi amalga oshirilmoqda.

Mazkur quyosh fotoelektr stansiyasi qurilishi Birlashgan Arab Amirliklarining “Tepelen group holding limited” kompaniyasiga qarashli “Navoi solar power energy” MChJ tomonidan olib borilmoqda, bosh pudratchi – Xitoyning “China energy enginiring corporation” (CEEC) kompaniyasi.

Qurilish ishlari ikki bosqichda amalga oshiriladi. Birinchi bosqichda 2025-yilning ikkinchi choragida quvvati 220 MW bo‘lgan quyosh fotoelektr stansiyasini ishga tushirish rejalashtirilgan. Ikkinchi bosqichda esa 2025-yilning to‘rtinchi choragi oxirigacha quvvati 280 MW bo‘lgan quyosh fotoelektr stansiyasini ishga tushirish mo‘ljallangan. Bu, o‘z navbatida, yiliga qariyb 1 mlrd. kW.h. elektr energiyasi ishlab chiqarish imkoniyatini yaratadi.

Ushbu quyosh fotoelektr stansiyasidan ishlab chiqariladigan elektr energiyasining asosiy isteʼmolchisi kombinat bo‘ladi (Zarafshon-Uchquduq hududidagi kombinat ishlab chiqarish quvvatlari hamda aholi uy-joylari yillik isteʼmolining 23-24 foizi). Shu munosabat bilan “NKMK” AJ va “Navoi solar power energy” MChJ o‘rtasida qurilayotgan quyosh fotoelektr stansiyasidan belgilangan narxda elektr energiyasining oldi-sotdi shartnomasi tuzildi. Mazkur obyekt “Auminzo-Amantoy” koni va 5-gidrometallurgiya zavodiga yaqin hududda barpo etilib, kombinat obyektlarini elektr energiyasi bilan taʼminlaydi.

Qurilayotgan quyosh fotoelektr stansiyasidan olinadigan elektr energiyasi uni yetkazish jarayonidagi yo‘qotishlarni sezilarli darajada oldini olish imkonini beradi.

“NKMK” AJ Matbuot xizmati.