Qurilish sohasi xodimlari kuni oldidan

Bunyodkorlik zamirida nafaqat qurilish yoki obodonlashtirish, balki Yangi O‘zbekiston taraqqiyotiga hissa qo‘shish maqsadi mujassam. Navoiy kon-metallurgiya kombinati ham o‘zining ulkan quruvchilar jamoasiga ega. Zero, kombinat yutuqlarini qurilish-bunyodkorlik ishlari va quruvchilar xizmatlarisiz tasavvur etib bo‘lmaydi.

Oltmish yilda amalga oshirilgan ishlar, qo‘lga kiritilgan yutuqlar natijasida Zarafshon qurilish boshqarmasi yurtimizda o‘z o‘rniga ega bo‘lgani bunga yaqqol misoldir. Albatta, bu ishlar o‘z-o‘zidan bo‘lgani yo‘q. Bunda, minglab insonlarning beqiyos xizmatlari bor. Korxonamiz yubileyi keng nishonlanayotgan shu kunlarda ularning ma’lum bir qismi yaqinlari ardog‘ida keksalik gashtini surayotgan bo‘lsa, ba’zilari afsuski oramizda yo‘q. Lekin, biz ularning xizmatlarini hamisha eslab, mamnuniyat bilan e’tirof etishni o‘zimiz uchun ham farz, ham qarz, deb bilamiz.

O‘tgan davr mobaynida, ayniqsa, keyingi yillarda barpo etilgan ishlab chiqarish va ijtimoiy infratuzilma obyektlari – turur-joylar, tibbiyot, madaniyat va sport muassasalari, istirohat bog‘lari va xiyobonlar, dam olish maskanlari, musiqali favvoralar, bolalar maydonchalari xalqimiz hayot darajasini yaxshilashga katta imkoniyatlarni yaratdi. Ustozlar, qadrdon hamkasblarimiz mehnatsevarligi, fidoyiligi va matonati evaziga Qizilqum sahrosi bag‘rida, respublikamizning ko‘plab hududlarida ko‘rkam konchilar maskanlari, ishlab chiqarish obyektlari qad rostladi. Konchilarning mashaqqatli mehnati, metallurglarning jasorati, boshqa soha vakillarining munosib hissasi evaziga ona zamin bag‘ridan qazib olinayotgan va tayyor mahsulotga aylantirilayotgan bu boyliklar yurtimiz iqtisodiyotini yuksaltirishga xizmat qilmoqda.

Bugun yurtimizning turli hududlarida, nafaqat yirik shaharlar, balki tuman markazlari, hatto chekka qishloqlarda ham ko‘zni quvontiradigan yangilanishlar yuz bermoqdaki, bu tarixiy jarayonlar ulkan bunyodkorlik davri sifatida Vatanimiz tarixi sahifalariga bitilishi, shubhasiz! Zero, so‘nggi yillarda mamlakatimizda qurilish sanoati davlatimiz iqtisodiyotining strategik muhim tarkibiy bo‘g‘iniga, jamiyatimiz hayoti, uning madaniyati va farovonligi rivojlanishining ajralmas qismiga aylanib ulgurdi.

Zarafshon qurilish boshqarmasi bunyodkorlarining fidokorona mehnatlari bilan Qizilqum sahrosida Navoiy, Zarafshon, Uchquduq kabi go‘zal sanoat shaharlari, Zarkent qo‘rg‘oni, Marjonbuloq shaharchasi singari konchilar maskanlari, shuningdek, qator ishlab chiqarish korxonlari, yirik gidrometallurgiya zavodlari va ijtimoiy soha obyektlari barpo etildi. Shu bilan birga, mamlakatimizning turli viloyatlarida sanoat inshootlarini qurish, qayta ta’mirlash va rekonstruksiya qilish ishlari olib borildiki, bu - zamonaviy bunyodkorlik majmualari sifatida tarixga muhrlandi.

Navoiy kon-metallurgiya kombinatida keyingi yillarda amalga oshirilgan va ayni paytda yuqori sur’atlarda davom etayotgan investitsion loyihalar asosida zamonaviy ishlab chiqarish obyektlarini qurish, yangi ishlab chiqarish quvvatlarini ishga tushirish, korxonalarni modernizatsiya qilish, texnik va texnologik qayta jihozlash ishlari boshqarmamiz jamoasiga ishonib topshirilmoqda. Biz, mas’uliyatni chuqur his etib, minglab malakali quruvchilarimiz hamda turli kasbdagi ishchi-xodimlarimiz bilan birga har qanday ob-havo sharoitida ham qurilish-montaj ishlarini olib borayapmiz. Ushbu mashaqqatli mehnat natijasida butun dunyoga ko‘z-ko‘z qilgulik ishlarni amalga oshirishga erishyapmiz.

Bu kabi keng qamrovli ishlar, yirik loyihalar ayni paytda ham davom etmoqda. Jumladan, “7-gidrometallurgiya zavodining qayta ishlash quvvatlarini kengaytirish” loyihasi qurilish ishlari o‘tgan yilda boshlangan bo‘lib, joriy yilda nihoyasiga yetkazilishi rejalashtirilgan. Loyiha bo‘yicha 4 ta tegirmon, 2 ta quyultirish bo‘linmasi bunyod etiladi, bosh bino kengaytiriladi, sorbsiya va desorbsiya, shuningdek, ishlab chiqarish quvvatlarini oshirish uchun zarur bo‘ladigan boshqa obyektlar quriladi.

“Sanoatelektrmontaj” tresti tomonidan metall konstruksiyalar, uskunalar va kabel tarmoqlari, sendvich panellar hamda elektr ta’mirlash ishlari amalga oshirilayotgan bo‘lsa, “Zarafshon” va “Navoiy” qurilish boshqarmalari loyiha asosida bosh bino, maydalash va quyultirish bo‘limlari, g‘alvirlash sexi, ma’danni saqlash va yetkazish bo‘limlari qurilishlarini jadal sur’atlarda olib borishmoqda. Yaqinda g‘alvirlash sexida poydevor ishlari to‘liq yakunlanib, ikkita maydalash sexini foydalanishga topshirish ishlari yakuniga yetkaziladi. Qo‘shimcha qozonlar uchun esa poydevor qurish ishlari boshlab yuborildi. Har bir obyektga temir-beton mahsulotlari zavodidan beton, armatura, metall konstruksiyalar va boshqa qurilish mahsulotlari o‘z vaqtida yetkazib berilayotgani ishning tez va sifatli olib borilishida katta ahamiyat kasb etyapti.

Bugun jamoamizning sa’y-harakati bilan “Muruntov” konining “Shimoliy-sharqiy majmuasining maydalash va tashish nuqtasini chuqurlashtirish”, Shimoliy kon boshqarmasining “Biooksidlanish sexi”, “Dovg‘iztov va Qoqpatas oltin konlarida ruda qazib olish III-bosqichi”, Markaziy va Shimoliy kon boshqarmasiga qarashli gidrometallurgiya zavodlaridagi mavjud va yangi “Chiqindilar saqlash omborxonalarini kengaytirish” loyihalari bo‘yicha qurilish-montaj ishlari olib borilmoqda. Yirik loyihalarimizdan bo‘lgan Janubiy kon boshqarmasi “Zarmitan” konining “Skipli” shaxta stvolini qurish” ishlari yakuniga yetkazilib, 30-aprel kuni ishga tushirildi. Bunday loyihalar nafaqat texnik va iqtisodiy, balki muhim ahamiyatga ham ega.

2024-yilda boshqarmamiz tomonidan 1,2 trillion so‘mlik qurilish ishlari bajarildi. Joriy yilning o‘tgan davrida ham reja va topshiriqlar o‘z vaqtida sifatli ado etilishida, hech shubhasiz, har bir hamkasbimizning faol ishtiroki, fidokorona mehnati mujassam.

Zimmamizga ishchi-xodimlar farovonligini oshirish, ularning hayotdan rozi bo‘lib yashashlari uchun qulay shart-sharoit yaratishdek ezgu maqsadlarni ham olganmiz. Zero, mamlakatimiz taraqqiyotini ta’minlash yo‘lida sidqidildan xizmat qilayotgan bunyodkorlarimizning halol mehnati har qanday hurmat va e’tiborga munosibdir. Ishchi-xodimlarimizni sog‘lomlashtirish maqsadida, respublikamiz va kombinat tasarrufida bo‘lgan sanatoriy-davolash muassasalariga yo‘llanmalar berilayapti. Yozgi ta’tilda ishchi-xodimlarimizning farzandlari “Pahlavon”, “So‘g‘diyona” va “Zarafshon” bolalar sog‘lomlashtirish oromgohlarida hordiq chiqarishlari tashkil etilmoqda.

Boshqarmamizda barcha turdagi ishlarni xavfsiz bajarish uchun zarur sharoitlar yaratilgan. Mehnat muhofazasi qoidalari, me’yorlar va yo‘riqnomalarga qat’iy rioya etilishi mutasaddilar tomonidan doimiy nazoratga olingan. Ish o‘rinlari har besh yilda bir marotaba mehnat sharoitlari bo‘yicha shahodatlashdan o‘tkaziladi. Unga ko‘ra, ishchi-xodimlar bepul davolovchi profilaktik ovqatlar, maxsus kiyim va poyafzal, yakka tartibdagi himoya vositalari bilan ta’minlanadilar. Ko‘pgina xodimlarimiz imtiyozli nafaqa ta’minoti huquqidan ham foydalanib kelmoqda.

Bugun, biz bunyod etayotgan bino va inshootlar bilan kelajakka mustahkam poydevor qo‘yayotganimizdan faxrlanamiz. Bunyodkorlik shijoati – bu faqat mehnat emas, balki orzu, ishonch, bu – yurakka joylangan fidoyilik hamdir. Boshqarmamiz jamoasi kombinatimiz va yurtimiz ravnaqi yo‘lida jonbozlik ko‘rsatishda davom etaveradi.

Otabek HASANOV,

Zarafshon qurilish boshqarmasi boshlig‘i