Navoiy kon-metallurgiya kombinati bo‘linmalarida konlardan qazib olinadigan tog‘ jinslarini doimiy va vaqtinchalik saqlash joylariga yetkazish hamda yuk tashishda avtotransport vositalaridan keng foydalaniladi.

Bu kabi ishlarni amalga oshirishga kombinatning yirik avtokorxonalaridan biri – Shimoliy kon boshqarmasining Avtomobil transporti boshqarmasi katta hissa qo‘shib kelmoqda. Shu bilan birga, kon boshqarmasi tarkibida “Auminzo-Amantoy” Avtomobil transporti boshqarmasi ham faoliyat olib bormoqda. Bugungi kunda har ikkala avtotransport boshqarmasida 2,6 ming nafardan ortiq ishchi-xodimlar mehnat qilmoqda.

Joriy yilning o‘tgan olti oyida mazkur avtokorxonalar tomonidan “Sharqiy”, “Dovg‘iztov”, “Auminzo-Amantoy”, “Turbay” konlaridan 71 mln. kubometrdan ortiq tog‘ jinslari tashilib, belgilangan rejalar ortig‘i bilan bajarildi. Ishlab chiqarish tannarxini kamaytirish va yoqilg‘i-moylash materiallaridan oqilona foydalanish maqsadida 2 224,4 tonna dizel yoqilg‘isi iqtisod qilindi.

- Hozirgi vaqtda Avtomobil transporti boshqarmalarida tog‘ jinslarini tashish jarayonida qariyb 250 ta og‘ir yuk tashuvchi avtoag‘dargichlar va 100 dan ortiq yo‘l-qurilish mashinalari hamda mexanizmlaridan keng foydalanilmoqda. Avtotransport parki asosan “Komatsu” va “Caterpillar” rusumli zamonaviy avtoag‘dargichlardan iborat, chunki ular har jihatdan qulay, unumdor va tejamkor. Joriy yilning 1-yarim yilligida yuk ko‘tarish quvvati 90 tonnadan ortiq bo‘lgan 52 ta zamonaviy avtoag‘dargich keltirilib, yil oxirigacha yana 11 ta shu kabi texnikalar keltirilishi rejalashtirilgan, - deydi “NKMK” AJ Transport departamenti Avtotransport vositalarini taʼmirlashni muvofiqlashtirish bo‘limi xizmat boshlig‘i Feruz Xayrullayev.

Taʼkidlash joizki, kombinat korxonalarida konchilik ishlarini amalga oshirishda zamonaviy avtotransport vositalaridan foydalanish yuqori ish unumdorligini taʼminlashga xizmat qilmoqda.

“NKMK” AJ Matbuot xizmati.