Bugungi kunda Markaziy kon boshqarmasi tarkibidagi Zarafshon taʼmirlash-mexanika zavodi bitta sex, oltita uchastka, byuro va xizmatlardan iborat bo‘lib, korxonada 600 nafardan ortiq ishchi-xodim mehnat qilmoqda va 8 ming turdagi mahalliylashtirilgan, import o‘rnini bosuvchi mahsulotlar ishlab chiqarilmoqda.

Navoiy kon-metallurgiya kombinatining Investitsiya dasturi doirasida loyihalarning amalga oshirilishi, yangi korxonalar barpo etilishi hamda qo‘shimcha quvvatlar ishga tushirilishi natijasida zavod mahsulotlariga bo‘lgan talab yildan-yilga ortib bormoqda. Zavod nafaqat Markaziy kon boshqarmasi, balki kombinat bo‘linmalari uchun ham zarur jihozlar va moslamalarni o‘z vaqtida, sifatli taʼmirlash va tayyorlab berishga xizmat qilmoqda.

- Korxonamiz faoliyatida mahalliylashtirish muhim ahamiyatga ega. Kombinatning deyarli barcha bo‘linmalari buyurtmalarini tayyorlaydigan jamoamiz Mahalliylashtirish dasturi doirasida samarali natijalarga erishmoqda. Jumladan, zavodda gidravlik ekskavatorlar va burg‘ilash uskunalari uchun turli ehtiyot qismlar, konveyerlar uchun roliklar, texnologik uskunalarning ehtiyot qismlar ishlab chiqarilib, gidrometalurgiya zavodlarida foydalanilayotgan nasoslar, texnologik uskunalar, ekskavatorlarning kovshlari va elektr dvigatellar taʼmirlanmoqda. 2024-yilda 200 mlrd. so‘mdan ortiq mahsulot ishlab chiqarilgan bo‘lsa, joriy yilda bu ko‘rsatkichni 250 mlrd. so‘mga yetkazish rejalashtirilgan, - deydi Zarafshon taʼmirlash-mexanika zavodi direktori Yuldash G‘aniyev.

Xorazm viloyati Tuproqqalʼa tumanidagi Sarimoy qishlog‘i aholisi bandligi taʼminlash maqsadida 2021-yilda zavodning “Sarimoy maydoni” payvandlash-mexanika uchastkasi tashkil etilgan edi. O‘tgan yillar mobaynida yuz nafardan ortiq ishsiz mahalliy aholi vakillari kombinat tomonidan kasbga o‘qitilib, hozirgi vaqtda ushbu uchastkada ishlab kelmoqda. Uchastkada 400 ga yaqin turdagi mahsulot o‘zlashtirilib, nasoslar uchun ehtiyot qismlari va uzellar, vallar, yarimmuftalar, boltlar, gayka va boshqa mahsulotlarni yasash, elektrogazpayvandlash ishlari bo‘yicha har xil hajmdagi konteynerlar, drenaj romlar va payvandlash usuli bilan detallarni taʼmirlash samarali yo‘lga qo‘yildi.

Zarafshon taʼmirlash-mexanika zavodi ishchi-xodimlari zimmasidagi vazifa va rejalarni o‘z vaqtida bajarib, ishlab chiqarish jarayonlariga o‘zlarining munosib hissalarini qo‘shib kelishmoqda.

“NKMK” AJ Matbuot xizmati